திரைவிமர்சனம்

‘சட்டம் ஒழுங்கோ, சாலை விதியோ... எதுவும் எங்க வீட்டுச் சேர் இல்ல. இழுத்துப் போட்டு உட்கார!’ ஆயிரம் புத்தகங்கள் சொல்லாத விஷயத்தை சினிமாவில் வரும் சின்ன காட்சி ஒன்று புத்தியில் அடித்த மாதிரி சொல்லிவிடும்!

அப்படி புத்தியில் அடித்திருக்கிறார் பவன் குமார். கன்னடத்தில் வந்த ‘லூசியா’ பட இயக்குனர். இதே ‘யு டேர்ன்’  கன்னடத்தில் வெளியாகி பெரும் ஹிட்டடித்து தற்போது தெலுங்கும் தமிழுமாக வந்திருக்கிறது. எங்கெல்லாம் போக்குவரத்து விதிகள் மீறப்படுகிறதோ, அங்கெல்லாம் போய் வர வேண்டிய படம்தான் இது!

வேளச்சேரி மேம்பாலத்தில் அமைக்கப்பட்டிருக்கும் நடுத் தடுப்பு கற்களை ஒதுக்கி வைத்து விட்டு ‘கிராஸ்’ பண்ணும் இளைஞர்கள் சிலர் அடுத்தடுத்து மர்மமான முறையில் இறக்கிறார்கள். போலீசின் சந்தேகப் பார்வை சமந்தா மீது விழுகிறது. இத்தனைக்கும் சமந்தா ஒரு பயிற்சி நிருபர். செய்யாத குற்றத்திற்காக மாட்டிக் கொண்டு தவிக்கும் இவரை காப்பாற்ற நினைக்கும் இன்னொரு போலீஸ் அதிகாரி ஆதிக்கு அடுக்கடுக்காக புலப்படும் உண்மைகளும் அதிர்ச்சிகளும்தான் க்ளைமாக்ஸ்.

இடைவேளைக்குப் பின் மெல்ல எட்டிப் பார்க்கிறது ஆவி ரூட்! அதிலும் கூட ஆவிப்படங்களின் டெம்ப்ளட்டை அறவே ஒழித்து புத்தம் புது ரூட் போட்டுக் கொடுக்கிறார் டைரக்டர் பவன் குமார். (இதுக்கே தனி சல்யூட் வாத்தியார்)

வரவர சமந்தா, நயன்தாராவாகிக் கொண்டிருக்கிறார்! ஒண்டி ஆளாக நின்று பர்பாமென்சில் பின்னி எடுப்பதோடு மட்டுமல்ல... கதை வேகத்திற்கு இணையாக ஓடும் தன் பதற்றமிகு கண்களாலும் பேசுகிறார். அழுகிறார். தழுதழுக்கிறார். தவிக்கிறார். நாயகி தேர்வு மட்டுமல்ல... படத்தில் வந்து போகும் எல்லா விஷயங்களும் அம்சமோ அம்சம்! காதல் வயப்பட்ட சமந்தா, மெல்ல தன் காதலை ராகுலிடம் சொல்லி ஒரு கனவு காண்பதற்குள் புயல் வீச ஆரம்பித்துவிடுகிறது. என்னதான் இருந்தாலும் க்ரைம் ரிப்போர்ட்டரான அவரிடம் தான் போலீசில் சிக்கிய விஷயத்தை சொல்லியிருக்கலாம்.

அதிகம் வேலையில்லை ராகுலுக்கு. அதுவும் சரிதான். நாக சைதன்யா கோபித்துக் கொள்வாரே!

கம்பீரமான போலீஸ் அதிகாரியாக ஆதி. நைட் ட்யூட்டி பார்க்கும் ஒரு போலீஸ் அதிகாரியின் கண்களில் சொக்கியிருக்கும் தூக்கமும், தொழில் தேவையும் ஒருங்கே புகுந்து விளையாடியிருக்கிறது. எளிதில் புரிந்து கொள்ள முடியாத அந்த மர்மத்தை நெருங்கிவிடும் ஆதி, அடுத்து சாகப்போவது இவர்கள்தான் என்று அறிந்து அவர்களை கொண்டு வந்து லாக்கப்பில் வைத்தால்... அங்கு நடக்கும் சம்பவம் அதிர்ச்சியோ அதிர்ச்சி. சற்றே பின் சீட்டில் சாய்ந்த ரசிகனும் பொசுக்கென முன்னால் நகர்கிற மொமென்ட் அது!

பூமிகா, சித்திரம் பேசுதடி நரேன் மற்றும் அந்த குட்டி ஏஞ்சல் மூவரும் கொஞ்ச நேரமே வருகிறார்கள். ஆனால் மனசெல்லாம் குடிகொள்கிற அளவுக்கு முக்கியத்துவம் வாய்ந்த நடிப்பு அது!

எந்த காட்சியும் வேஸ்ட் இல்லை. எந்த நடிகர்களும் வேஸ்ட் இல்லை என்கிற அளவுக்கு பார்த்து பார்த்து செதுக்கியிருக்கிறார்கள் இயக்குனரும் எடிட்டரும். நிகேஷ் பொம்மிரெட்டியின் ஒளிப்பதிவு மொத்த திகிலையும் நமக்குள் கடத்தி விடுகிறது.

பின்னணி இசையில் தெறிக்க விட்டிருக்கிறார் பூர்ண சந்திர தேஜஸ்வினி. இதுபோன்ற ஹாரர் திரில்லர்களுக்கு பாடல்கள் தேவையில்லை என்பதை அழுத்தமாக பதிவு செய்த காரணத்திற்காகவே ஒரு சபாஷ்.

சாலை பாதுகாப்பை அஸ்திவாரமாக வைத்துக் கொண்டு ஒரு மேம்பாலமே கட்டிவிட்டார் இயக்குனர். எந்த செங்கல்லிலும் பிரச்சார நெடி இல்லை என்பதுதான் விசேஷம்.

ரசிகர்களே... யு டேர்ன்,  your turn now

-ஆர்.எஸ்.அந்தணன்

சமீபமாக வாழ்க்கை வரலாற்று திரைப்படங்களுக்கு ரசிகர்கள் மத்தியில் பெரும் வரவேற்பு கிடைத்து வருகிறது.

சுவிற்சர்லாந்தின் நியோன் நகரில் நடைபெறும் Vision du Reel சர்வதேச ஆவணத்திரைப்பட விழாவில், இம்முறை சிறந்த முழு நீள ஆவணத் திரைப்படத்திற்கான விருதை பெற்றுக்கொண்டது இத்தாலிய திரைப்படமான Punta Sacra.

தமிழில் வணிக சினிமாக்கள் இரண்டு வகையாக இயங்குகின்றன. ஒன்று முற்று முழுதாக ரசிகர்கள் ஊகித்துவிடும் கதைப்போக்குடன் அமைக்கப்படும் மசாலா சட்டகத்தைக் கொண்டவை. மற்றொன்று அந்த சட்டக்கத்தைக் கொஞ்சம் மீறி, விறுவிறுப்பான திரைக்கதையைக் கொண்டிருந்தாலும் வணிக அம்சங்களையும் சித்தரிப்புகளையும் கைவிடாத வகையாக வெளியாவது.

ஹாரிபாட்டர் புகழ் ஜே.கே.ரவுலிங், தனது இக்காபாக் (The Ickabog) எனும் ஒரு அரக்கனைப் பற்றிய விசித்திரக் கதையின் முதல் பாகத்தை ஆன்லைனில் இலவசமாக வெளியிட்டுள்ளார்.

21 ஆம் நூற்றாண்டின் தொடக்கத்தில் 2003 ஆமாண்டு விண்ணுக்கு பூமியின் தாழ்வு ஒழுக்கில் வலம் வந்து கொண்டிருக்கும் ISS என்ற சர்வதேச விண்வெளி ஆய்வு மையத்துக்கு சென்று திரும்புகையில் எந்திரக் கோளாறால் கொலம்பியா என்ற விண் ஓடம் விபத்தில் சிக்கியது.

இளையராஜா எனும் அற்புதக் கலைஞனை 60-களுக்கு பிறகு பிறந்த யாராலும் தவிர்க்கவே முடியாமல் அன்றாடம் கடந்து செல்ல வேண்டியிருக்கும்.

பன்னிரு இராசிகளுக்குமான ஜுன் மாத இராசி பலன்கள். பரம்பரை ஜோதிடர் பெருங்குளம் இராமகிருஷ்ணன் கணித்துத் தரும் துல்லியமான பலன்கள். ஒவ்வொரு ராசியினருக்குமான பரிகார விபரங்களும் எளிமையான விளக்கங்களும்.