திரைவிமர்சனம்

‘இந்தா புள்ளைய வச்சுக்கோ... உன் லேப்டாப்பை கொடு’ என்று முக்கால்வாசி கணவன்களை ‘தாயுமானவனாக்கி’ தள்ளிவிட்டுப் போகிறார்கள் பெண்கள்! பிள்ளைகளின் வருங்காலம் பொசுங்கி விடக்கூடாது என்பதற்காகவே இந்த ஒப்பந்த வாழ்வின் தீப்பந்தங்களுக்குள் வாழ ஆரம்பிக்கிறார்கள் ஆண்கள்!

அவர்களுக்கெல்லாம் ‘ஆண் தேவதை’ என்கிற பட்டத்தை வழங்கி, கவுரவித்திருக்கிறார் இயக்குனர் தாமிரா!

சமுத்திரக்கனி ரம்யா பாண்டியன் தம்பதிகளுக்கு குட்டி குட்டியாக இரண்டு குழந்தைகள். ‘குழந்தைகளின் எதிர்காலத்தை பிரகாசமாக்கணும். கார், பங்களான்னு வாழணும்’என்று லட்சியப்படும் ரம்யா பாண்டியன், ‘ரெண்டு பேரும் வேலைக்குப் போனா குழந்தைகள் ஏங்கிடும். ஸோ... நான் வேலைக்கு. நீ வீட்டுக்கு’ என்று கணவன் சமுத்திரக்கனியை சம்மதிக்க வைத்துவிட்டு ஐ.டி வேலைக்கு போக ஆரம்பிக்கிறார். ஒருநாள் இரவு குடும்ப அமைதிக்கு குந்தகம் ஏற்படுகிறது. ‘என் தயவு இல்லாம சொந்த காசில் ஒரு நாள் வாழ்ந்து பார். முடியுமா உன்னால?’ என்று சவால் விடுகிறார் மனைவி. கோபித்துக் கொண்டு தன் பெண் குழந்தையுடன் வெளியேறும் சமுத்திரக்கனிக்கு ஏற்படும் அனுபவங்களும் பட்டறிவும்தான் ஆண்தேவதை. தம்பதி மீண்டும் இணைந்ததா என்பது க்ளைமாக்ஸ்!

குட் டச், பேட் டச் என்று பெண் குழந்தைகளுக்கு அவசியமான அட்வைசுடன் துவங்குகிறது படம். தன் குழந்தையின் விரல் பிடித்து சென்னையில் நடக்க ஆரம்பிக்கும் சமுத்திரக்கனி ஆங்காங்கே பிளாஷ்பேக்குகளுக்குள் மூழ்க ஆரம்பிக்க, கவிதையும் செய்யுளுமாக கண் முன்னே விரிகிறது படம். ‘சமுத்திரக்கனியா... அட்வைஸ் பண்ணியே சாவடிப்பாரே?’ என்கிற முனகலுக்கெல்லாம் செவி கொடுக்காமல் ஒரு பாசக்கார அப்பனாக வாழ்ந்து முடித்திருக்கிறார் கனி. இவருக்கென்றே எழுதப்படும் கேரக்டர்கள் இவரிடமே வந்து சேர்வதுதான் இறைவனின் திருக்கொடை போல!

இரவு முழுக்க தூங்காமல் தவிக்கும் குழந்தையை ஓரிடத்தில் தூங்க வைத்துவிட்டு சந்தோஷப்படும் அந்த அப்பனின் முகம், ஒவ்வொரு அப்பனின் கண்ணாடி ரூம்!

ரம்யா பாண்டியன் மட்டும் என்னவாம்? அலட்டாமல் நடித்திருக்கிறார். தான் செய்வதே சரி என்று நினைக்கும் சம்பளக்கார சம்சாரங்களின் பிரதிபலிப்பும் கூட! ஆடம்பர வாழ்வுக்கு ஆசைப்பட்டால் அதோகதிதான் என்பதை புரிய வைத்திருக்கிறது இந்த கேரக்டர். எல்லாம் சரி... குழந்தைக்கு ஒரு பிரச்சனை என்றால், தப்பு செய்தவனை விட்டு விட்டு தட்டிக் கேட்டவனையா குற்றம் சொல்வது? அந்த இடத்தில் சறுக்குகிறது ரம்யாவின் பில்டப்!

அதே அலுவலகத்தில் பணியாற்றும் ஆடம்பர கேரக்டராக சுஜா வாருணி. தேவைக்கு மிகாத அட்வைஸ். தேவைப்படுகிற நேரத்தில் முடிவு என்று நறுக்குத் தெறித்தார்போல வந்து போகிறார்.  

பேபி மோனிகாவின் அழகும், அவள் கேட்கிற கேள்விகளும் அழகு. இன்னொரு குழந்தை கவின் பூபதியும் கண்கலங்க விடுகிறான். இவ்விரண்டு குழந்தை தேர்வும் அட்சர சுத்தம்!

முஸ்லீம் பெரியவராக ராதாரவி. ஊருக்கே நல்லது செய்கிறவரின் நிழலில் விபச்சாரப் பெண்ணொருத்தி. இப்படி சின்ன சின்ன தவறுகளை சரி செய்யாமல் கடந்திருக்கிறார் இயக்குனர் தாமிரா.

ஜிப்ரானின் பின்னணி இசையும் பாடல்களும், கட்டுக்குலையாத மெட்டுகளாகி கவனிக்க வைக்கிறது. எஸ்.டி.விஜய்மில்டனின் ஒளிப்பதிவில் ஒரு இரவின் தனிமையும் தத்தளிப்பும் மனதில் நுழைந்து இம்சை கொடுத்திருக்கிறது.

காதலர்களை சுற்றி சுற்றி வந்து ‘ஊலலலா’ பாடுகிற உடான்ஸ் சினிமா தேவதைகளுக்கு மத்தியில், ‘அளவோடு இருக்கட்டும் ஆடம்பரம்’ என்ற கருத்தை விதைத்த ஆண்தேவதை... ரொம்பவே அவசியமானவன்!

-ஆர்.எஸ்.அந்தணன்

மின்னஞ்சலில் பதிவுகள் பெறுவதற்கு :

இவற்றையும் பார்வையிடுங்கள்

‘சிந்து சமவெளி’ எனும் சர்ச்சைக்குரிய திரைப்படத்தில் கதாநாயகியாக நடித்து தமிழில் அறிமுகமானவர் அமலா பால். அதன்பின்னர், மைனா, வேட்டை, தெய்வத்திருமகள், தலைவா, வேலையில்லா பட்டதாரி உள்ளிட்ட பல வெற்றி படங்களில் நடித்து தமிழ் சினிமாவிம்ன் முன்னணி கதாநாயகியாக உயர்ந்தார்.

கடந்த இரு வாரங்களுக்கு முன் முடிவுக்கு வந்த லொகார்னோ சர்வதேச திரைப்பட விழாவில், இம்முறை கொரோனா காரணமாக, இணைய வழி திரைக்காட்சிகளே அதிகம் இடம்பெற்றிருந்தன.

ஒருவனின் திறமையைக் கண்டு அவன் மீது காதலில் விழும் பெண், தனக்கு வராத படிப்புடன் வம்படியாக மல்லுக்கட்டும் ஒரு துறுதுறுக் குறும்புப் பெண்ணின் தீவிர முயற்சி என்னவாகிறது என்பது ஒரு வரிக்கதை.

இச் சிறுகதையினை வாசித்து முடிக்கையில் ஒரு தியானம் செய்த மன உணர்வு எழக்கூடும். இந்தப் பூவுலகின் மீதும் வாழ்தலின் மீதூமான பற்றுதல் அதிகரிக்கக் கூடும்.

பெப்ரவரி 21 திகதியான இன்று பன்னாட்டுத் தாய்மொழித்தினம் கொண்டாடப்படுகிறது.

‘வாரணம் ஆயிரம்’ ஷமீரா ரெட்டியை தமிழ் ரசிகர்களால் மறக்கமுடியாது. கௌதம் மேனன் இயக்கத்தில் கவுதம் மேனன் இயக்கத்தில் சூர்யா நடிப்பில் கடந்த 2008ம் ஆண்டு வெளியான வாரணம் ஆயிரம் படம் மூலம் தமிழ் திரையுலகில் அறிமுகமானவர் ஷமீரா ரெட்டி.

சிவகார்த்திகேயனுக்காக ஏ.ஆர்.ரஹ்மானின் இசையில் புதிய திரைப்படமான அயலான் பாடல் அண்மையில் வெளியானது. பாடலில் வருவது போல் பாடலும் வேற லெவல் சகோக்களே!