விளையாட்டு
Typography

இலங்கைக்கும் அவுஸ்திரேலியாவுக்கும் இடையில் காலியில் இடம்பெற்றுவந்த இரண்டாவது டெஸ்ட் கிரிக்கெட் போட்டியில், இலங்கை அணி 229 ஓட்டங்களினால் வெற்றி பெற்றது. இதன்மூலம், அவுஸ்திரேலியாவுக்கு எதிராக டெஸ்ட் தொடரொன்றை இலங்கை முதற்தடவையாக வெற்றி கொண்டுள்ளது. 

மூன்று போட்டிகளைக் கொண்ட டெஸ்ட் தொடரில், ஏற்கனவே தம்புள்ளையில் இடம்பெற்ற போட்டியில் வெற்றி பெற்றிருந்த இலங்கை அணி, காலியில் இன்று நிறைவு பெற்ற போட்டியிலுவும் வெற்றி பெற்று 2:0 என்ற கணக்கில் முன்னிலையில் உள்ளது. 

இலங்கை தனது முதல் இன்னிங்ஸில் 281 ஓட்டங்களுக்கு சகல விக்கட்டுக்களையும் இழந்தது. பதிலுக்கு தனது முதல் இன்னிங்ஸில் ஆடிய அவுஸ்திரேலியா, இலங்கை சுழற்பந்து வீச்சாளர்களுக்கு முகங்கொடுக்க முடியாமால் 106 ஓட்டங்களுக்கு ஆட்டமிழந்தது. 

இதனையடுத்து, இரண்டாவது இன்னிங்ஸில் ஆடிய இலங்கை சகல விக்கட்டுக்களையும் இழந்து 237 ஓட்டங்களைப் பெற்றது. இதன்மூலம், அவுஸ்திரேலிய அணிக்கு 412 என்ற வெற்றி இலக்கு நிர்ணயிக்கப்பட்டது. ஆனாலும், போட்டியின் மூன்றாவது நாளாக இன்று அவுஸ்திரேலியா தன்னுடைய இரண்டாவது இன்னிங்ஸில் 183 ஓட்டங்களுக்கு சகல விக்கட்டுக்களையும் இழந்து தோல்வி கண்டது. 

இலங்கை அணியின் சுழற்பந்து விச்சாளரான டில்ருவான் பெரேரா இரண்டு இன்னிங்ஸிலும் சேர்த்து மொத்தமாக 10 விக்கட்டுக்களை வீழ்த்தினார். ரங்கன ஹேரத் 6 விக்கட்டுக்களை வீழ்த்தினார். 

இலங்கை, அவுஸ்திரேலியா இடையிலான மூன்றாவது டெஸ்ட் கிரிக்கெட் போட்டி கொழும்பு எஸ்.எஸ்.ஸி மைதானத்தில் எதிர்வரும் 13ஆம் திகதி ஆரம்பிக்கவுள்ளது. 

 

BLOG COMMENTS POWERED BY DISQUS

மின்னஞ்சலில் பதிவுகள்

மின்னஞ்சலில் பதிவுகள்