இந்தியா
Typography

12 வயதுக்குட்பட்ட சிறுமிகளை பாலியல் பலாத்காரம் செய்தால் மரண தண்டனை விதிக்க வகை செய்யும் அவசர சட்டத்துக்கு குடியரசுத் தலைவர் ராம்நாத் கோவிந்த் ஒப்புதல் அளித்துள்ளார். 

நாட்டில் சிறுமிகளுக்கு எதிரான பாலியல் குற்றங்கள் சமீப காலமாக அதிகரித்து இருப்பது பல்வேறு தரப்பினரிடமும் கவலையை ஏற்படுத்தி உள்ளது. காஷ்மீர் மற்றும் குஜராத்தில் முறையே 8 மற்றும் 9 வயது சிறுமிகள் கூட்டு பலாத்காரம் செய்து கொடூரமாக கொல்லப்பட்டதும், உத்தரபிரதேசத்தின் உன்னாவில் 17 வயது சிறுமி ஒருவர் பா.ஜ.க. சட்டமன்ற உறுப்பினர் உள்ளிட்டோரால் வன்புணர்வு செய்யப்பட்டதும் நாட்டை உலுக்கியது.

டெல்லி நிர்பயா கற்பழிப்பு சம்பவத்தை போல நாடு முழுவதும் கொந்தளிப்பை ஏற்படுத்திய இந்த சம்பவங்களால் அதிர்ச்சியடைந்த மகளிர் அமைப்பினரும், அரசியல் கட்சியினரும், சிறுமிகளை பாலியல் வன்புணர்வு புரிவோருக்கு மரண தண்டனை விதிக்கும் வகையில் சட்ட திருத்தம் கொண்டு வர வேண்டும் என அரசை வலியுறுத்தினர்.

இதைப்போல பாலியல் குற்றங்களில் இருந்து குழந்தைகளை பாதுகாக்கும் ‘போக்சோ’ சட்டத்தில் திருத்தங்கள் மேற்கொள்ளுமாறு மத்திய மந்திரி மேனகா காந்தி உள்பட பல்வேறு தரப்பினரும் கோரிக்கை விடுத்தனர்.

இதைத்தொடர்ந்து மத்திய மந்திரிசபை நேற்று முன்தினம் பிரதமர் நரேந்திர மோடி தலைமையில் கூடியது. இந்த கூட்டத்தில், சிறுமிகளை பாலியல் பலாத்காரம் செய்வோருக்கு கடும் தண்டனை விதிக்கும் வகையில் அவசர சட்டம் கொண்டுவர முடிவு செய்யப்பட்டது.

அதன்படி இந்திய குற்றப் பிரிவு சட்டம், சாட்சிய சட்டம், குற்றவியல் நடைமுறை சட்டம் மற்றும் ‘போக்சோ’ சட்டம் ஆகியவற்றில் திருத்தம் மேற்கொண்டு அவசர சட்டமாக குடியரசுத் தலைவருக்கு அனுப்பி வைக்கப்பட்டது.

இந்த அவசர சட்டத்துக்கு நேற்று ஞாயிற்றுக்கிழமை குடியரசுத் தலைவர் ஒப்புதல் அளித்தார். இது தொடர்பாக அரசாணை வெளியிடப்பட்டுள்ளது.

BLOG COMMENTS POWERED BY DISQUS

பகிர்வதற்கு

 

 

மின்னஞ்சலில் பதிவுகள்

மின்னஞ்சலில் பதிவுகள்