இந்தியா

காவேரி மருத்துவமனையில் அனுமதிக்கப்பட்டுள்ள தி.மு.க. தலைவர் மு.கருணாநிதியின் உடல் நலம் குறித்து, மு.க.ஸ்டாலின் உள்ளிட்டோரிடம் நடிகர் விஜய் நேரில் கேட்டறிந்தார். 

தி.மு.க. தலைவர் கருணாநிதி உடல்நலம் பாதிக்கப்பட்டு சென்னை கோபாலபுரத்தில் உள்ள அவருடைய வீட்டில் இருந்தபடியே சிகிச்சை பெற்று வந்தார். கடந்த மாதம் 27ஆந் தேதி இரவு அவருக்கு திடீரென உடல்நல குறைவு ஏற்பட்டது. இதையடுத்து அவர் உடனடியாக சென்னை ஆழ்வார்பேட்டையில் உள்ள காவேரி ஆஸ்பத்திரியில் அனுமதிக்கப்பட்டார். அங்கு டாக்டர்கள் குழுவினர் தீவிரமாக கண்காணித்து சிகிச்சை அளித்து வருகின்றனர்.

தி.மு.க. செயல் தலைவர் மு.க.ஸ்டாலின், கனிமொழி எம்.பி. உள்ளிட்டோரும் கருணாநிதி உடல்நிலையில் நல்ல முன்னேற்றம் ஏற்பட்டு வருவதாக தெரிவித்தனர். இது ஆஸ்பத்திரியின் வெளியே திரண்டிருந்த தொண்டர்களுக்கு மகிழ்ச்சியை ஏற்படுத்தியது.

துணை ஜனாதிபதி வெங்கையா நாயுடு, தமிழக கவர்னர் பன்வாரிலால் புரோகித், முதல்-அமைச்சர் எடப்பாடி பழனிசாமி, புதுச்சேரி முதல்-மந்திரி நாராயணசாமி, தேசியவாத காங்கிரஸ் கட்சி தலைவர் சரத்பவார் மற்றும் தமிழக அரசியல் கட்சி தலைவர்கள், நடிகர்கள் காவேரி ஆஸ்பத்திரிக்கு வந்து கருணாநிதியின் உடல்நிலை குறித்து கேட்டறிந்தனர். அரசியல் கட்சி பிரமுகர்கள், அமைப்புகள், திரைப்பட துறையை சேர்ந்தவர்கள் என பல்வேறு தரப்பினரும் கருணாநிதியின் உடல்நிலை குறித்து காவேரி ஆஸ்பத்திரிக்கு வந்து கேட்டறிந்து செல்கின்றனர்.

இந்த நிலையில், திமுக தலைவர் கருணாநிதியின் உடல் நலம் பற்றி கேட்டறிய, நடிகர் விஜய் இன்று காலை காவேரி மருத்துவமனைக்கு வருகை தந்தார். மருத்துவமனையில், திமுக செயல் தலைவர் மு.க ஸ்டாலின் உள்ளிட்டோரை சந்தித்து கருணாநிதியின் உடல் நலம் பற்றி கேட்டறிந்தார்.