இந்தியா

“இந்தியா சுதந்திரமடைந்த பின்னர் அதிக பெரும்பான்மையும் அமையும் ஆட்சி எங்களுடையது.” என்று பிரதமர் நரேந்திர மோடி தெரிவித்துள்ளார். 

17வது மக்களவைத் தேர்தல் முடிவுகளில் 350 தொகுதிகளில் பா.ஜ.க தலைமையிலான தேசிய ஜனநாயகக் கூட்டணி முன்னிலையில் உள்ளது. மோடி தலைமையிலான பா.ஜ.க இரண்டாவது முறையாக தனிப்பெரும்பான்மையுடன் மீண்டும் ஆட்சி அமைக்க உள்ளது. 2014ஆம் ஆண்டைவிட இந்த முறை அதிக இடங்களை பா.ஜ.க கைப்பற்றியுள்ளது. இந்தியாவில் இரண்டாவது முறையாக தனிப்பெரும்பான்மையுடன் ஒரு கட்சி ஆட்சி அமைப்பது 50 ஆண்டுகளில் இது முதல் முறையாகும்.

இந்த வரலாற்று வெற்றியை நாடு முழுவதும் பா.ஜ.க கொண்டாடி வருகின்றது. வெற்றியை அடுத்து அமித் ஷா, மோடி உள்ளிட்ட பா.ஜ.க தலைவர்கள் டில்லியிலுள்ள கட்சியின் தலைமை அலுவலகத்தில் இடம்பெற்ற வெற்றிக் கூட்டத்தில் கலந்து கொண்டனர்.

அங்கு திரண்டிருந்த தொண்டர்கள் மத்தியில் பேசிய மோடி, “உலக ஜனநாயகத்தில் இந்த வெற்றி முக்கியமானது. புதிய இந்தியாவை உருவாக்க வேண்டும் என்ற எங்கள் கோரிக்கைக்கு கோடிக்கணக்கான மக்கள் ஆதரவு தந்துள்ளனர். 130 கோடி மக்களுக்கு தலைவணங்கி நன்றி தெரிவித்துக்கொள்கிறேன். இந்தத் தேர்தலில்தான் அதிகபட்சமாக வாக்குப்பதிவு நடந்துள்ளது. கடும் வெயிலிலும், மோசமான வானிலை நிலவிய போதும் அதிகளவு மக்கள் வாக்களித்துள்ளனர். இது பெரிய அதிசயம். எந்த ஆண்டும் இல்லாத வகையில் இந்த ஆண்டுதான் அதிகளவு மக்கள் வாக்களித்துள்ளனர். உலக நாடுகள் இந்தியாவில் நடந்த இந்த ஜனநாயகத் திருவிழாவை வியந்து பார்க்கின்றன.

மக்கள் மோடி வென்றுள்ளதாக கூறுகிறார்கள். அப்படி இல்லை. இது மோடியின் வெற்றிகிடையாது. இந்த ஆட்சியின் மீது நம்பிக்கை வைத்த நேர்மையான மக்களின் வெற்றியாகும். இந்தத் தேர்தலில் நாடு வென்றுள்ளது, நாட்டு மக்கள் வெற்றி பெற்றுள்ளனர். நாங்களும் எங்கள் கூட்டணிக் கட்சிகளும் இந்த பிரமாண்ட வெற்றியை மக்களின் பாதங்களில் சமர்ப்பிக்கிறோம். சொந்த வீட்டுக்காக ஏங்கும் மக்களுக்கு கிடைத்த வெற்றி. வியர்வை சிந்தி உழைக்கும் விவசாயிகளின் வெற்றி. சுதந்திரத்துக்குப் பிறகு அதிக பெரும்பான்மையுடன் அமையும் ஆட்சி எங்களுடையது. இந்தத் தீர்ப்பின் மூலம் சாதி, வாரிசு அரசியல் புதைக்கப்பட்டுள்ளது. இந்தியாவின் மூலை முடுக்கில் உள்ள மக்கள் அனைவரும் பா.ஜ.க-வுக்கு ஆதரவு வழங்கியுள்ளனர். பிரதமராக முதல் பயணத்திலேயே பல தடைகளைக் கடந்தேன். ஆனால், ஒருபோதும் தளர்வடையவில்லை. என்னை நாட்டு மக்கள் புரிந்துகொண்டு வாக்களித்துள்ளனர். பல கோடி மக்கள் இந்த பிச்சைக்காரனின் பையை வாக்குகள் மூலம் நிரப்பியுள்ளனர்.

இதற்காக கடின உழைப்பைக் கொடுத்த அமித் ஷாவுக்கு எனது நன்றிகளை சொல்லிக்கொள்கிறேன். பா.ஜ.க ஆளாத மாநில அரசுகளுக்கு மத்திய அரசு முழு ஒத்துழைப்பு அளிக்கும். கூட்டாட்சித் தத்துவத்தைப் பேணும் வகையில், மாநில அரசுகளுக்கு உதவுவேன். கூட்டாட்சி தத்துவத்தில் எங்களுக்கு அதிக நம்பிக்கை இருக்கிறது. இந்தியா, இனி சூப்பர் பவர் என்பதை இந்த உலகம் குறித்துக்கொள்ளட்டும். முதல்முறையாக இந்தத் தேர்தலில் தான் ஆளும் கட்சி மீது எதிர்க்கட்சிகள் ஊழல் குற்றச்சாட்டை சொல்லமுடியாமல் போனது. இனி மதச்சார்பின்மை முகமூடியை அணிந்துகொண்டு யாரும் நாட்டை ஏமாற்ற முடியாது. இப்போது இரண்டு விஷயங்கள்தான் உள்ளன. ஒன்று ஏழ்மை. இன்னொன்று ஏழ்மையை அகற்ற விரும்பும் நபர் ஒருவர்." என்றுள்ளார்.

இவற்றையும் பார்வையிடுங்கள்

கொரோனா வைரஸ் தொற்று காரணமாக வீடுகளில் நிகழும் உயிரிழப்புக்களைத் தடுப்பதற்கு உடனடி நடவடிக்கை எடுக்குமாறு ஜனாதிபதி கோட்டாபய ராஜபக்ஷ உத்தரவிட்டுள்ளதாக இராணுவ தளபதி சவேந்திர சில்வா தெரிவித்துள்ளார். 

மஹர சிறைச்சாலையில் நேற்று ஞாயிற்றுக்கிழமை இடம்பெற்ற வன்முறையை அடுத்து தமது வைத்தியசாலைக்கு 6 சடலங்கள் எடுத்து வரப்பட்டதாக ராகம வைத்தியசாலை நிர்வாகம் அறிவித்துள்ளது. 

மீண்டும் வங்கடலில் உருவாகியுள்ள காற்றழுத்த தாழ்வுபகுதியால் தென் தமிழகத்தில் கனமழை பெய்ய வாய்ப்பு உள்ளதாக தெரிவிக்கப்பட்டுள்ளது.

இந்தியாவின் டெல்லியை நோக்கி விவசாயிகள் 2வது நாளாக பேரணி மேற்கொண்டுள்ளனர். இதனால் டெல்லியில் போக்குவரத்து பாதிக்கப்பட்டுள்ளதாக தெரிவிக்கப்படுகிறது.

இத்தாலியின் சுகாதார அதிகாரிகள் கடந்த வெள்ளிக்கிழமை வழங்கிய சோதனை தரவுகளின் படி, கடந்த 14 நாட்களில் நாடு முழுவதும் , கோவிட் -19 வைரஸ் தொற்று வீதம் குறைந்திருப்பதனால், மூன்று சிவப்பு மண்டலங்கள் மற்றும் இரண்டு ஆரஞ்சு மண்டலங்களில் இந்த வார இறுதியில் அதாவது இன்று ஞாயிறு முதல் பாதுகாப்பு விதிகள் தளர்த்தப்படும்.

சுவிற்சர்லாந்தில் முதல் கொரோனா வைரஸ் தடுப்பூசிகள் அடுத்து வரும் இரண்டு மாதங்களுக்குள் வெளியிடப்படும் என்று சுவிஸ் சுகாதார அமைச்சர் அலைன் பெர்செட் தெரிவித்துள்ளார். சென்ற வியாழக்கிழமை இடம்பெற்ற செய்தியாளர் சந்திப்பொன்றில், பெர்செட் இதனைத் தெரிவித்துள்ளார்.