இந்தியா
Typography

தேனி மாவட்டம் பெரியகுளம் அருகே கைலாசப்பட்டியில் உள்ள தனது பண்ணை வீட்டில் முன்னாள் முதல்-அமைச்சர் ஓ.பன்னீர்செல்வம் நிருபர்களிடம் தீபாவுடன் இணைந்து செயல்பட தயார் என்று கூறியுள்ளார். 

தேர்தல் ஆணையத்திடம் எங்கள் தரப்பு நியாயமான வாதங்களை முன் வைத்துள்ளோம். இதன் தொடர்ச்சியாக தேர்தல் ஆணையம் மேலும் விவரங்கள் கேட்டு நேரில்  அழைத்துள்ளது. நாங்கள் டெல்லி சென்று கட்சியின் சட்ட விதிமுறைகள் குறித்து எடுத்துரைப்போம். 

எம்.ஜி.ஆருக்கு பின்னால் அ.தி.மு.க.வை மாபெரும் இயக்கமாக ஜெயலலிதா நடத்தி வந்தார். சிறந்த நிர்வாகத்தை அளித்தார். ஜெயலலிதாவின் கொள்கை கோட்பாடுகளை ஏற்றுக் கொண்டு தீபாவுடன் இணைந்து செயல்பட தயார். 

சட்டியில் இருந்தால்தான் அகப்பையில் வரும். வெறும் கரண்டியால் என்ன செய்ய முடியும்? எடப்பாடி பழனிச்சாமி தலைமையிலான ஆட்சியின் நிதிநிலை அறிக்கை வெறும் கரண்டியை போல இருக்கிறது. ராமேசுவரம் மீனவர்கள் மீது இலங்கை கடற்படையினர் நடத்திய துப்பாக்கி சூட்டுக்கு மத்திய மாநில அரசுகள் பொறுப்பேற்க வேண்டும். 

ஜெயலலிதா மறைவுக்கு பிறகு தமிழகத்தில் அசாதாரண சூழ்நிலை ஏற்பட்டிருந்தபோது அவருடைய வழியில் திறமையான ஆட்சியை நடத்தி வந்தேன். தற்போது உள்ள அரசியல் சூழ்நிலை தொடர்பாக மக்கள் நல்ல தீர்ப்பு தருவார்கள். 

எனக்கு தனிக்கட்சி தொடங்கும் எண்ணம் இல்லை. இரட்டை இலை சின்னத்தை முடக்க வாய்ப்பு இல்லை. அது எங்களுக்குத்தான் கிடைக்கும். எங்களுடன் அ.தி.மு.க. அமைச்சர்கள், எம்.எல்.ஏ.க்கள் பேசிக் கொண்டுதான் இருக்கிறார்கள். கட்சியின் பொதுச் செயலாளரை எம்.எல்.ஏ.க்களோ, பொதுக்குழு உறுப்பினர்களோ தேர்ந்தெடுக்க முடியாது. கட்சி உறுப்பினர்கள்தான் தேர்ந்தெடுக்க முடியும். கட்சி சட்ட விதிப்படி தேர்வு செய்யப்படாத பொதுச் செயலாளர் பதவியில் தொடர்வது செல்லாது என்று நாங்கள் வாதிட்டுக் கொண்டு இருக்கிறோம். மேலும் அவரால் ஏற்கனவே உள்ள நிர்வாகிகளை நீக்கவோ, புதிய நிர்வாகிகளை நியமிக்கவோ முடியாது. 

இந்நிலையில் ஜெயலலிதாவால் ஒழுங்கு நடவடிக்கை எடுக்கப்பட்டு ஒதுக்கி வைக்கப்பட்ட தினகரன் மீண்டும் சேர்க்கப்பட்டு துணைப் பொதுச் செயலாளராக அறிவித்து ஆர்.கே.நகரில் போட்டியிடுவது அ.தி.மு.க. கட்சி சட்டத்துக்கு எதிரானது.என்று அவர் கூறினார்.

 

Most Read