இந்தியா
Typography

திரைப்படங்களில் புகை எச்சரிக்கைக்கான தடை பரிந்துரையை ஏற்கக் கூடாது என்று பாமக இளைஞரணி தலைவர் அன்புமணி ராமதாஸ் அறிக்கை விடுத்துள்ளார். 

திரைப்படங்களில் புகைப்பிடிக்கும் காட்சிகளின் போது ‘புகைப் பிடித்தல் உடல்நலத்திற்கு தீங்கானது’ என்ற எச்சரிக்கை வாசகங்களை காட்டும் முறையை ரத்து செய்ய வேண்டும் என்று புகழ் பெற்ற இயக்குனர் ஷியாம் பெனகல்தலைமையிலான குழு மத்திய அரசுக்கு பரிந்துரைத்திருக்கிறது. இளைய தலைமுறையினரின் வாழ்க்கை முறையில் தீமையை ஏற்படுத்தும் இப்பரிந்துரையை அரசு ஏற்கக்கூடாது.என்று அறிக்கை விடுத்துள்ளார் அன்புமணி ராமதாஸ்.

மேலும் அந்த அறிக்கையில், ரைப்படம் தொடங்குவதற்கு முன் ஒரே ஒருமுறை புகையின் தீமையை விளக்கும் பின்னணிக் காட்சியுடன் எச்சரிக்கை செய்தியை பின்னணி குரலில் காட்டினால் போதுமானது. ஒவ்வொரு முறையும் புகைப்பிடிக்கும் காட்சிகளின் போது,‘புகைப் பிடித்தல் உடல் நலத்திற்குத் தீங்கானது’ என்ற எச்சரிக்கை வாசகங்களை காட்டத் தேவையில்லை என்பதுதான் ஷியாம் பெனகல் குழு அரசிடம் அளித்துள்ள பரிந்துரையின் முக்கிய அம்சம் ஆகும்.

உண்மையில், திரைப்படங்களில் புகைப்பிடிக்கும் காட்சிகளின் போது எச்சரிக்கை வாசகங்களை காட்டும் முறையில் ஏதேனும் மாற்றம் செய்ய வேண்டுமா என்பது பற்றி பெனகல் குழுவிடம் மத்திய அரசு எந்த பரிந்துரையும் கேட்கவில்லை. திரைப்படங்களுக்கான சட்டத்தில் மாற்றம் செய்வதற்கான பரிந்துரைகளை அளிப்பதற்காகத்தான் இக்குழு கடந்த 01.01.2016 அன்று அமைக்கப்பட்டது. அக்குழு 26.04.2016 அன்று அளித்த அறிக்கையில், அது அமைக்கப்பட்டதன் நோக்கத்திற்கு சற்றும் பொருத்தமில்லாமல், திரைப்படங்களில் புகைப்பிடிக்கும் காட்சிகளுக்கான கட்டுப்பாடுகளை நீக்க பரிந்துரைத்திருக்கிறது. இது போகாத ஊருக்கு வழி காட்டும் செயலாகும்.

இந்தியாவில் புகைப்பழக்கத்தால் ஆண்டுக்கு 10 லட்சம் பேர் உயிரிழக்கின்றனர். புகைப் பழக்கத்திற்கு அடிமையானோரில் 53 சதவிகிதம் பேர் படங்களில் தங்களுக்கு பிடித்த நடிகர்கள் புகைப்பிடிப்பதைப் பார்த்து தான் அவ்வாறு ஆனார்கள் என உலக நலவாழ்வு நிறுவனம் (WHO) நடத்திய ஆய்வில் தெரியவந்துள்ளது. திரைப்படங்களில் இடம் பெறும் புகைப்பிடிக்கும் காட்சிகளின் தீய தாக்கத்தை கட்டுப்படுத்துவதற்காக நான் மேற்கொண்ட நடவடிக்கைகளும், சந்தித்த எதிர்ப்புகளும் கொஞ்ச நஞ்சமல்ல. மத்திய சுகாதாரத் துறை அமைச்சராக இருந்த போது தான் பல்வேறு தரப்பினரின் எதிர்ப்புகளையும் மீறி திரைப்படங்களில் புகைப்பிடிக்கும் காட்சிகளுக்கு 02.10.2005 காந்தியடிகளின் பிறந்த நாள் முதல் தடை விதிக்கப்பட்டது. அத்தடையை ரத்து செய்து 2009 ஆம் ஆண்டு ஜனவரி மாதம் டெல்லி உயர்நீதிமன்றம் தீர்ப்பளித்த நிலையில், உடனடியாக அந்த தீர்ப்பை எதிர்த்து உச்சநீதிமன்றத்தில் மேல்முறையீடு செய்யப்பட்டது.

மத்திய அமைச்சர் பதவியிலிருந்து விலகிய பிறகும் நான் தொடர்ந்து அளித்து வந்த வலியுறுத்தல் காரணமாக 2011 ஆம் ஆண்டு நவம்பர் 14 ஆம் தேதி ஜவகர்லால் நேரு பிறந்த நாள் முதல், புகைப்பிடிக்கும் காட்சிகளின் போது கடுமையான எச்சரிக்கை வாசகங்களை காட்டும் திட்டத்தை செயல்படுத்துவதாக அரசு அறிவித்தது. அதன்படி, திரைப்படம் தொடங்குவதற்கு முன்பும், இடைவேளை முடிந்து மீண்டும் காட்சி தொடங்குவதற்கு முன்பும் புகைப்பிடிக்கும் பழக்கத்தை கைவிட வலியுறுத்தும்வி ளம்பரப்படங்களும், மது மற்றும் புகைப்பிடித்தலின் தீமையை விளக்கும் வாசகங்களின் பின்னணியில் அவற்றை அத்திரைப்படத்தில் நடித்த ஒரு நடிகர் வாசிக்கும் எச்சரிக்கை செய்தியும் காட்டப்படவேண்டும்.

அத்துடன் திரையில் ஒவ்வொரு முறை புகைப்பிடிக்கும் காட்சி வரும் போதும், புகைப்பிடித்தல் உடல் நலத்திற்கு தீங்கானது என்பதை வலியுறுத்தும் வாசகம் திரையில் ஓடவிடப்பட வேண்டும். ஆனால், கடைசி நேரத்தில் பல்வேறு அழுத்தங்கள் காரணமாக இத்திட்டத்தை மத்திய அரசு கைவிட்டு விட்டது. அதைத்தொடர்ந்து, 2012 ஆம் ஆண்டு அறிவிக்கப்பட்ட திட்டத்தில் புகைக்கட்டுப்பாட்டு விதிகள் மேலும் தளர்த்தப்பட்டன. திரைப்படம் தொடங்குவதற்கு முன்பும், இடைவேளை முடிந்து மீண்டும் காட்சி தொடங்கும் முன்பும் புகையிலை எதிர்ப்பு விளம்பரங்களும், எச்சரிக்கைச் செய்தியும் காட்டப்பட வேண்டும். அத்துடன் புகைப்பிடித்தல் உடல் நலத்திற்கு தீங்கானது என்ற வாசகம் திரையில் ஓடுவதற்கு பதில், நிலையாக காட்டினால் போதுமானது  என மத்திய அரசு சமரசம் செய்து கொண்டது.

இப்போது அதற்கும் வேட்டு வைக்கும் பரிந்துரையை பெனகல் குழு அளித்துள்ளது. திரைப்படங்களில் புகைப் பிடிக்கும் காட்சிகளுக்கு கட்டுப்பாடு விதித்துள்ள ஒரே நாடு இந்தியாதான். இக்கட்டுப்பாடுகளாலும், தனிப்பட்ட முறையில் நான் செய்த பரப்புரையாலும் பல நன்மைகள் ஏற்பட்டன. இந்தியாவில் ஏவிஎம் நிறுவனமும், ஹாலிவுட்டில் டிஸ்னி நிறுவனமும் தங்களின் படங்களில் புகைக் காட்சிகள் இடம்பெறாது என அறிவித்தன. நடிகர்கள் ரஜினிகாந்த், விஜய், சூர்யா, விக்ரம் ஆகியோரும் புகைக் காட்சிகளில் நடிக்க மாட்டோம் என உறுதியளித்தனர். இந்த நன்மைகளை பெனகல் குழு பரிந்துரை கெடுத்துவிடும்.

திரைப்படங்களில் புகைப் பிடிக்கும் காட்சிகளுக்கு தடை விதிக்கப்பட்ட போது அதை கடுமையாக எதிர்த்தவர் ஷியாம் பெனகல். அப்படிப்பட்டவர் தலைமையிலான குழு இந்த விஷயத்தில் முடிவெடுப்பது எப்படி சரியாக இருக்கும். பெனகல் குழுவின் உறுப்பினர்களில் எனது நண்பர் நடிகர் கமலஹாசனும் ஒருவர். திரைப்படங்களில் புகைப்பிடிக்கும் காட்சிகள் கூடாது என்ற எனது முயற்சிக்கு துணை நின்ற சிலரில் இவர் முக்கியமானவர். அதுமட்டுமின்றி, தமக்கு குழந்தைகள் பிறந்த நாள் முதல், கடந்த 25 ஆண்டுகளாக திரைப்படங்களில் புகைப்பிடிக்கும் காட்சிகளில் நடிக்காதவர். அதன்மூலம் சிறுவர்கள் புகைப்பழக்கத்திற்கு அடிமையாவதை தடுத்திருக்கிறேன் என்பதை பெருமையாகச் சொல்பவர். புகைப் பழக்கம் தான் புற்றுநோய்க்கு காரணம் என்பதில் உறுதியாக இருக்கும் கமலஹாசன், தமது ஊதியத்தில் ஒரு பகுதியை அடையாறு புற்றுநோய் மருத்துவமனைக்கு தருவதை வழக்கமாகக் கொண்டிருப்பவர். அவரையும் மீறி இப்படி ஒரு பரிந்துரை அளிக்கப்பட்டிருக்கிறது என்றால், அதன் பின்னணியில் வட இந்திய திரைத்துறையை இயக்கும் சக்திகளும், புகையிலை லாபியும் உள்ளன என்பதை உணரலாம்.என்று கூறியுள்ளார்.

அதோடு, 2003ஆம் ஆண்டு புகையிலைப் பொருட்களின் விளம்பரங்களுக்கு தடை விதிக்கப்பட்டதையடுத்து திரைப்படங்கள் மற்றும் தொலைக்காட்சித் தொடர்களில் புகைப்பிடிக்கும் காட்சிகள் அதிகரித்தன. புகையிலைப் பொருட்களை விளம்பரம் செய்யும் நோக்குடன்தான் இத்தகைய காட்சிகளை படங்களில் புகையிலை லாபி தந்திரமாக திணித்தது. அதற்கு முடிவு கட்டும் நோக்குடன் தான் திரைப்படங்களில் புகைப்பிடிக்கும் காட்சிகளுக்கு தடை விதிக்கப்பட்டது.

அதேபோல், புகையிலைப் பொருட்கள் உறைகளின் மீது இப்போது 85% அளவுக்கு எச்சரிக்கைப் படங்கள் வெளியிடப்படுவது கட்டாயமாக்கப்பட்டிருப்பதால், புகையிலைப் பொருட்களுக்கான விளம்பரப் பரப்பு குறைந்திருக்கிறது. அதை ஈடுகட்டுவதற்காகவே திரைப்படங்களில் புகை எதிர்ப்புக் கட்டுப்பாடுகளை வலுவிழக்கச் செய்யும் முயற்சிகள் தொடங்கியுள்ளன.

இந்தியாவில் 72% திரைப்படங்களில் புகைப்பிடிக்கும் காட்சிகள் இடம் பெறுகின்றன. திரைப்படங்களில் வரும் காட்சியைப் பார்த்துதான் 53 விழுக்காட்டினர் புகைப்பிடிக்கக் கற்றுக் கொள்கின்றனர். இத்தகைய சூழலில் புகைக் காட்சிகளின் போது அதற்கு எதிரான வாசகங்கள் இருந்தால் தான் அதன் தீய தாக்கத்தை ஓரளவாவது தடுக்க முடியும். புகைப் பழக்கத்தால் இந்தியாவில் ஆண்டுக்கு 10 லட்சம் பேர் இறக்கும் நிலையில், இது மேலும் அதிகரிக்க அனுமதிக்கக் கூடாது. எனவே, திரைப்படங்களில் புகைப்பிடிக்கும் காட்சிகள் தொடர்பான ஷியாம் பெனகல் குழுவின் பரிந்துரைகளை நிராகரித்து இப்போதைய நிலையே தொடர்வதை மத்திய அரசு உறுதி செய்ய வேண்டும்.என்று அன்புமணி ராமதாஸ் தமது அறிக்கையில் கேட்டுக்கொண்டு உள்ளார்.

BLOG COMMENTS POWERED BY DISQUS