இலங்கை

காணாமல் போனோருக்கான அலுவலகம், காணாமல் ஆக்கப்பட்டோரின் உறவுகளுடன் மன்னாரில் நேற்று சனிக்கிழமை நடத்திய முதலாவது கலந்துரையாடல் நம்பிக்கையளித்துள்ளதாக காணாமல் போனோருக்கான அலுவலகத்தின் தலைவர் சாலிய பீரிஸ் தெரிவித்துள்ளார். 

இந்தக் கலந்துரையாடலில், காணாமல் ஆக்கப்பட்டவர்களின் குடும்பங்களைச் சேர்ந்த 250 உறுப்பினர்கள் வரையில் பங்கேற்றதாகவும், இது வெற்றிகரமானதாக அமைந்தது என்றும் அவர் குறிப்பிட்டுள்ளார்.

சாலிய பீரிஸ் மேலும் கூறியுள்ளதாவது, “முதலாவது சந்திப்பில் பொது அமைப்புகளின் பிரதிநிதிகள் மற்றும் ஊடகவியலாளர்களும் பங்கேற்றனர். அவர்களுடன் நாம் ஆக்கபூர்வமான கலந்துரையாடலை மேற்கொண்டோம். செயல்முறைகள் தொடர்பாக உறவினர்கள் பல கவலைகளை எழுப்பினர். பெரும்பாலான குடும்ப உறுப்பினர்கள் மனச்சோர்வும் விரக்தியும் அடைந்துள்ளனர். ஆனாலும் அவர்கள் பதில் கிடைக்கும் என்ற நம்பிக்கையில் தேடிக் கொண்டிருக்கிறார்கள். காணாமல் போனோர் அலுவலகம், அதன் செயல்பாடுகளின் ஊடாக, மக்களின் நம்பிக்கையைப் பெறும் என்று நம்புகிறது.” என்றுள்ளார்.

புதிய அரசியலமைப்பை உருவாக்குவதற்கான ஆணையை எதிர்வரும் பொதுத் தேர்தலில் நாட்டு மக்கள் வழங்க வேண்டும் என்று ஸ்ரீலங்கா பொதுஜன பெரமுனவின் தேசிய அமைப்பாளர் பசில் ராஜபக்ஷ வேண்டுகோள் விடுத்துள்ளார். 

“நீண்டகால கலாச்சராத்தையும் பாரம்பரியத்தினையும் பின்பற்றி வருகின்ற தமிழ் மக்களுடைய உரிமைகள் எவராலும் இலகுவாக நிராகரிக்கப்பட முடியாத ஒன்றாகும். இதனை மிகவும் உறுதியாக வலியுறுத்த விரும்புகின்றோம்.” என்று தமிழ்த் தேசியக் கூட்டமைப்பின் தலைவர் இரா.சம்பந்தன் தெரிவித்துள்ளார். 

இந்தியாவில் பெரும் பரபரப்பை ஏற்படுத்திய சாத்தான்குளம் போலீசார் விசாரணையில் உயிரிழந்த தந்தை-மகன் சம்பவத்தையடுத்து தமிழ்நாட்டில் பிரெண்ட்ஸ் ஆஃப் போலீஸ் அமைப்பினருக்கு அரசு தடை விதித்துள்ளது.

கொரோனா நோய்த்தொற்று இந்தியாவில் அசுர வேகத்தில் பரவி வருவதால் இத் தொற்றால் மொத்தம் பாதித்தவர்களின் எண்ணிக்கை 7 லட்சம் 42 ஆயிரத்தை கடந்துள்ளது. எனினும் மும்பை நகரத்தின் தாராவியில் கொரோனா தொற்று கட்டுப்படுத்தப்பட்டுள்ளதாக தெரிவிக்கப்பட்டுள்ளது.

இந்தோனேசிய தீவின் ஜாவா கடற்கரையில் 6.6 ரிக்டர் அளவிலான நிலநடுக்கம் ஏற்பட்டுள்ளதாக தகவல்கள் தெரிவிக்கின்றன. உள்ளூர் அதிகாரிகள் வெளியிட்ட தகவல்களின்படி நிலநடுக்கம் காரணமாக எந்தவிதமான சேதமும் ஏற்படவில்லை என அறியவருகிறது.

தெற்காசிய நாடுகளில் இந்தியாவை அடுத்து மிக அதிக கொரோனா தொற்றுக்கள் கொண்ட நாடாக பாகிஸ்தான் விளங்குகின்றது.