இலங்கை
Typography

‘கட்சியொன்றில் போட்டியிட்டு பாராளுமன்ற உறுப்பினராக தெரிவானவர்கள், சுயாதீனமாகச் செயற்பட்டால், அவர்களின் கட்சி உறுப்புரிமையை நீக்கப்படும். அப்போது, அவர்கள் பதவி இழக்கும் சூழல் ஏற்படும்’ என்று அமைச்சரவைப் பேச்சாளரும் அமைச்சருமான ராஜித சேனாரத்ன தெரிவித்துள்ளார். 

கொழும்பில் நேற்று புதன்கிழமை நடைபெற்ற வாராந்த அமைச்சரவை முடிவுகளை அறிவிக்கும் ஊடகவியலாளர் சந்திப்பில் கேட்கப்பட்ட கேள்விகளுக்குப் பதிலளிக்கும் போதே அவர் இவ்வாறு குறிப்பிட்டுள்ளார்.

ஐக்கிய மக்கள் சுதந்திரக் கூட்டமைப்பில் அங்கம் வகிக்கும், ஸ்ரீலங்கா சுதந்திரக் கட்சியைச் சேர்ந்த உறுப்பினர்கள், கூட்டு எதிரணியுடன் (மஹிந்த அணி) இணைந்து பாராளுமன்றத்தில் சுயாதீனமாகச் செயற்படவுள்ளதாகத் தெரிவித்துள்ளனர். அவ்வாறான நிலையொன்று ஏற்படுமாயின், கூட்டு எதிரணி உறுப்பினர்களின் எண்ணிக்கை அதிகரிக்கும். அப்போது எதிர்க்கட்சித் தலைவர் விவகாரம் மீண்டும் கேள்விக்குள்ளாகும் என்று குறிப்பிட்டு கேள்வியெழுப்பினர்.

எதிர்க்கட்சித் தலைவர் பதவி தொடர்பில், சபாநாயகர் கரு ஜயசூரிய கடந்தவாரம், அறிவிப்பொன்றை விடுத்துள்ளார். இந்நிலையில், பாராளுமன்றத்தில் சுயாதீனமாகச் செயற்படுவதற்கு யாராவது தீர்மானித்தால், அவ்வாறானவர்கள், தாம் போட்டியிட்ட கட்சியிலிருந்து நீக்கப்படுவர். அப்போது, பாராளுமன்ற உறுப்பினர் பதவி பறிபோய்விடும் என்று பதிலளித்த ராஜித்த சேனாரத்ன, அதன்பின்னர், ஆரம்பத்திலிருந்து வரவேண்டும் என்றுள்ளார்.

அரசியலமைப்பின் 19வது திருத்தத்துக்கு அமைய, பாராளுமன்றத் தேர்தலில் அரசியல் கட்சி ஒன்றின் கீழ், போட்டியிட்டு பாராளுமன்ற உறுப்பினர்களாகத் தெரிவு செய்யப்பட்டவர்கள், பாராளுமன்றத்தில் சுயாதீனமாகச் செயற்படமுடியாது. சுயேட்சையாகப் போட்டியிட்டு தெரிவானவர்கள் மட்டுமே, சுயேட்சையாக செயற்பட முடியும் என்று தெரிவித்த அவர், கட்சியொன்றிலிருந்து பாராளுமன்ற உறுப்பினராக தெரிவானவர்கள், சுயேட்சையாக செயற்பட்டால், அவர்களின் கட்சி உறுப்புரிமையை நீக்கும் அதிகாரம் அந்தந்த கட்சிகளின் பொதுச்செயலாளருக்கே உள்ளது என்றுள்ளார்.

இதேவேளை, தமது கட்சி உறுப்பினர்கள், கூட்டு எதிரணியுடன் இணைந்து சுயாதீனமாக செயற்படுவதற்கு முடிவு செய்தால், அவர்களை கட்சியிலிருந்து நீக்குவதற்கு நடவடிக்கை எடுப்பதாக, ஸ்ரீலங்கா சுதந்திரக் கட்சியின் பொதுச் செயலாளர் ரோஹன லக்ஷ்மன் பியதாச தெரிவித்துள்ளமை குறிப்பிடத்தக்கது.

 

BLOG COMMENTS POWERED BY DISQUS