இலங்கை
Typography

“நாட்டில் இனவாதத்துக்குத் தூபமிடும் யுகத்துக்கு முடிவு கட்டப்பட்டு விட்டது. ஆகவே, முல்லைத்தீவு நாயாறு மீனவர் பிரச்சினையை வைத்து எவரும் மீண்டும் இனவாதத்தைத் தூண்ட முயற்சிக்க வேண்டாம்” என்று தேசிய கலந்துரையாடல் அமைச்சர் மனோ கணேசன் தெரிவித்துள்ளார். 

முல்லைத்தீவு நாயாறு பகுதியில் அண்மையில் தெற்கு மீனவர்களின் மீன் வாடிகள் தீயிட்டுக் கொளுத்தப்பட்டதாகவும், அது இனவாதச் செயல் என்றும் பாராளுமன்ற உறுப்பினர் விமல் வீரவன்ச நேற்று வெள்ளிக்கிழமை பாராளுமன்ற அமர்வின் போது தெரிவித்த குற்றச்சாட்டுக்குப் பதிலளித்த போதே; மனோ கணேசன் இவ்வாறு கூறியுள்ளார்.

மேற்படி விவகாரம் திரிபுபடுத்தப்பட்டுள்ளதாகவும், தெற்கிலிருந்து சட்டவிரோதமாகச் சென்று மீன்பிடிப்பவர்களே அங்கு பரம்பரையாக மீன்பிடித் தொழிலில் ஈடுபட்டு வருபவர்களின் வாடிகளைக் கொளுத்தியுள்ளதாகவும் அவர் சபையில் தெளிவுபடுத்தினார். அவ்வாறில்லை என அதனை மறுத்து கருத்துக் கூற விமல் வீரவன்ச உள்ளிட்ட கூட்டு எதிரணி (மஹிந்த அணி) பாராளுமன்ற உறுப்பினர்கள் முயன்ற போதும், தம்மை தெளிவுபடுத்த விடுமாறும் அங்குள்ள மாவட்டச் செயலாளரின் உண்மையான அறிக்கைக்கிணங்கவே நாம் சபையில் இதனை வெளியிடுவதாகவும் அமைச்சர் குறிப்பிட்டார்.

எவ்வாறெனினும் இந்த விவகாரம் தொடர்பில் ஜனாதிபதியின் கவனத்துக்குக் கொண்டு வரப்பட்டுள்ளதாகவும், அதற்கிணங்க அடுத்த கட்ட செயற்பாடுகள் இடம்பெறும் என்றும் அமைச்சர் மனோ கணேசன் மேலும் தெரிவித்தார்.

BLOG COMMENTS POWERED BY DISQUS