உலகம்

கொரோனா வைரசின் கடும் பாதிப்புக்குள்ளான நாடுகளில் ஒன்றான இத்தாலியில், தலையொட்டிப்பிறந்த இரட்டையர்களை அறுவை சிகிச்சை மூலம் வெற்றிகரமாகப் பிரித்து, மருத்துவ உலகில் மகத்தான சாதனை புரிந்துள்ளார்கள் இத்தாலிய மருத்துவர்கள்.

இத்தாலியின் தலைநகர் ரோமிலுள்ள " ஜேசுபாலகன்" ( Bambino Gesu ) மருத்துவமனை, கடந்த செவ்வாயன்று இரண்டு வயதான தலையொட்டிப் பிறந்த இரட்டையர்களை, அறுவை சிகிச்சை மூலம் வெற்றிகரமாகப் பிரித்தெடுத்த செய்தியினை அறிவித்துள்ளது.

இதுபோன்ற உடலமைப்பில் இணந்த இரட்டையர்கள் பிரிக்கப்பட்டது, இத்தாலி மற்றும் உலகில் இதுவே முதல் தடவையாகும் என்று மருத்துவமனை வட்டாரங்கள் தெரிவித்தள்ளன. அரிதான மற்றும் மிகவும் சிக்கலான வடிவங்களில் ஒன்றான பெருமூளை இணைவுடன், மண்டையோடு ஒட்டிப்பிறந்த சகோதரிகள் எர்வினா மற்றும் ப்ரீஃபினா ஆகியோர் வெற்றிகரமாகப் பிரிக்கப்பட்டதாகவும், இருவரும் நல்ல உடல் ஆரோக்கியத்துடன் இருப்பதாகவும் மருத்துவர்கள் தெரிவித்துள்ளார்கள்.

மத்திய ஆபிரிக்க குடியரசின் பாங்கு (Bangui) வைச் சேர்ந்த இரு சகோதரிகளும் 2018 செப்டம்பரில் இத்தாலிக்கு அழைத்து வரப்பட்டனர். மருத்துவமனையின் தலைவர் இரட்டையர்களையும் அவர்களின் தாயையும் மருத்துவ மையத்தில் சந்தித்தார்.

இத்தாலியில் நடத்தப்பட்ட சோதனைகள் இரட்டையர்கள் பொதுவாக நல்ல ஆரோக்கியத்துடன் இருப்பதைக் காட்டின, ஆனால் ஒரு சகோதரியின் இதயம் "மூளை உட்பட இருவரின் உறுப்புகளின் உடலியல் சமநிலையை" பராமரிக்க கடினமாக உழைப்பதை மருத்துவர்கள் கண்டறிந்தனர். ஆயினும், சிறுமிகளுக்கு "தனித்துவமான" ஆளுமைகள் இருந்ததும் தெரிய வந்தது.

நரம்பியல் அறுவை சிகிச்சை நிபுணர்கள், மயக்க மருந்து நிபுணர்கள், நரம்பியல் நிபுணர்கள், பிளாஸ்டிக் அறுவை சிகிச்சை நிபுணர்கள், பொறியாளர்கள் மற்றும் பிசியோதெரபிஸ்டுகள் உட்பட நிபுணர்களின் குழுவொன்று அமைக்கப்பெற்று, எதிர்கொள்ளும் மிகப்பெரிய சவால்கள் குறித்து ஆராயப்பட்டது. சிறுமிகளின் மூளையில் இருந்து இரத்தத்தை தங்கள் இதயங்களுக்கு கொண்டு வரும் இரத்த நாளங்களின் பகிர்வு வலைப்பின்னல்மிகப்பெரிய சவாலாக இருந்தது எனவும், இரண்டு சுயாதீன சிரை அமைப்புகளை படிப்படியாக புனரமைக்க மூன்று மிக நுட்பமான செயல்பாடுகள் தேவையாக இருந்ததாகவும் தெரிவிக்கின்றார்கள்.

இறுதியாக ஜூன் 5ந் திகதி அறுவை சிகிச்சைக்கான நாள் குறிக்கப்பட்டது. மருத்துவர்கள் மற்றும் செவிலியர்கள் 30 பேர் கொண்ட குழு, 18 மணிநேரம் தொடர்ச்சியாக இயங்கி, பகிரப்பட்ட மண்டை ஓட்டின் எலும்புகளைப் பிரித்தெடுத்து, இரண்டு மூளைகளை உள்ளடக்கிய மென்படலத்தை புனரமைத்து, புதிய மண்டை ஓடுகளுக்கு மேல் தோல் உருவாக்குவது வரையிலான சிகிச்சையினை மேற்கொண்டது.

அறுவை சிகிச்சை நடைபெற்ற ஒரு மாதத்திற்குப் பிறகு, இரட்டையர்கள் நலமாக உள்ளனர் எனும் செய்தியினை கடந்த செவ்வாயன்று மருத்துவமனை வட்டாரங்கள் அதிகாரபூர்வமாக அறிவித்தன.

இந்த அறிவிப்பின்போது, ஜூன் 29 ஆம் தேதி இரட்டையர்களின் இரண்டாவது பிறந்தநாளுக்காக தங்கள் தாயுடன் வழங்கப்பட்ட ஒரு மருத்துவமனை விருந்தின் வீடியோ படங்கள் வழங்கப்பட்டன. சகோதரிகள் ஆரோக்கியமாக இருக்கிறார்கள் எனினும், நோய்த்தொற்று ஏற்படும் அபாயம் இன்னும் இருப்பதாகவும், சிறுமிகள் சில மாதங்களுக்கு பாதுகாப்பு ஹெல்மெட் அணிய வேண்டியிருக்கும் என்றும் மருத்துவர்கள் குறிப்பிட்டுள்ளனர்.

அறுவைசிகிச்சைக்குப் பின்னர் அவர்களின் மூளை இயல்புடன் இயங்குவதாகவும், இது அவர்கள் சாதாரணமாக வளரவும், தங்கள் வயதினரைப் போலவே ஒரு சாதாரண வாழ்க்கையை நடத்தவும் வாய்ப்புக் கிடைக்கும் என்றும் தலைமை மருத்துவர் தெரிவித்தார். கடந்த 20 ஆண்டுகளில் ஐரோப்பாவில் இரட்டையர்களைப் பிரிக்கும் இரண்டு வழக்குகள் மட்டுமே மண்டை ஓட்டின் உச்சியில் இணைந்துள்ளன. ரோம் "ஜேசுபாலகன்" மருத்துவமனை அதன் வரலாற்றில் இணைந்த இரட்டையர்களுக்கு அறுவை சிகிச்சை செய்வது, இது நான்காவது முறையாகும்.

இந்தச் செய்தியை மற்றவர்களும் அறிவது நல்லது எனில் கீழேயுள்ள பட்டன்களில் அழுத்தி உங்கள் சமூக வலைத் தளங்களில் பகிர்ந்து கொள்ளுங்கள்

 

இவற்றையும் பார்வையிடுங்கள்

கொரோனா வைரஸ் தொற்று காரணமாக வீடுகளில் நிகழும் உயிரிழப்புக்களைத் தடுப்பதற்கு உடனடி நடவடிக்கை எடுக்குமாறு ஜனாதிபதி கோட்டாபய ராஜபக்ஷ உத்தரவிட்டுள்ளதாக இராணுவ தளபதி சவேந்திர சில்வா தெரிவித்துள்ளார். 

மஹர சிறைச்சாலையில் நேற்று ஞாயிற்றுக்கிழமை இடம்பெற்ற வன்முறையை அடுத்து தமது வைத்தியசாலைக்கு 6 சடலங்கள் எடுத்து வரப்பட்டதாக ராகம வைத்தியசாலை நிர்வாகம் அறிவித்துள்ளது. 

மீண்டும் வங்கடலில் உருவாகியுள்ள காற்றழுத்த தாழ்வுபகுதியால் தென் தமிழகத்தில் கனமழை பெய்ய வாய்ப்பு உள்ளதாக தெரிவிக்கப்பட்டுள்ளது.

இந்தியாவின் டெல்லியை நோக்கி விவசாயிகள் 2வது நாளாக பேரணி மேற்கொண்டுள்ளனர். இதனால் டெல்லியில் போக்குவரத்து பாதிக்கப்பட்டுள்ளதாக தெரிவிக்கப்படுகிறது.

இத்தாலியின் சுகாதார அதிகாரிகள் கடந்த வெள்ளிக்கிழமை வழங்கிய சோதனை தரவுகளின் படி, கடந்த 14 நாட்களில் நாடு முழுவதும் , கோவிட் -19 வைரஸ் தொற்று வீதம் குறைந்திருப்பதனால், மூன்று சிவப்பு மண்டலங்கள் மற்றும் இரண்டு ஆரஞ்சு மண்டலங்களில் இந்த வார இறுதியில் அதாவது இன்று ஞாயிறு முதல் பாதுகாப்பு விதிகள் தளர்த்தப்படும்.

சுவிற்சர்லாந்தில் முதல் கொரோனா வைரஸ் தடுப்பூசிகள் அடுத்து வரும் இரண்டு மாதங்களுக்குள் வெளியிடப்படும் என்று சுவிஸ் சுகாதார அமைச்சர் அலைன் பெர்செட் தெரிவித்துள்ளார். சென்ற வியாழக்கிழமை இடம்பெற்ற செய்தியாளர் சந்திப்பொன்றில், பெர்செட் இதனைத் தெரிவித்துள்ளார்.