OTT - ஆஹாவென எழும் திரைப்புரட்சி !

தொழில்நுட்பம்
Typography
  • Smaller Small Medium Big Bigger
  • Default Helvetica Segoe Georgia Times

ஸ்டீரிமிங் மீடியாவான ஓடிடி சேவை, சினிமா மீது ஏற்படுத்திக்கொண்டிருக்கும் தாக்கத்தையும், அதன் எதிர் கால போக்கை எவ்விதம் தீர்மானிக்கும் என்பதையும், இவற்றின் பின்னே உள்ள தொழில்நுட்ப அடிப்படைகளையும் அலசும் சுவாரஸ்யமான தொடர்.

4தமிழ்மீடியாவில் வாரந்தோறும் வரவிருக்கும் இப்புதிய தொடரின் மூலம் பல்வேறு தொழில்களின் புதிய சிந்தனைகளை அறிமுகம் செய்து, அவற்றின் விளைவுகளை ஆராய்து பதிவு செய்யவுள்ள பிரபல தொழில்நுடபவியாளர் "சைபர் சிம்மன்" எமது வாசகர்களுக்குப் புதியவர் அல்ல. ஆனால் மிக நீண்ட நாட்களின் பின் 4தமிழ்மீடியாவில்  புதிய தொடர் மூலம் சிந்திக்கவும், சந்திகக்கவும் வரும் எழுத்தாளர் "சைபர் சிம்மன்" னுக்கு, ஒரு வசந்த வரவேற்பு !

இத் தொடரில் அவர் என்னவெல்லாம் சொல்லவுள்ளார் என்பது குறித்து அவரே தரும் அறிமுகம் கீழே...

ஓடிடி பற்றி இப்போது எல்லோரும் பேசுகின்றனர். இது தொடர்பான விவாதமும் அனல் பறக்கிறது. இணையம் மூலம் படங்களையும், தொலைக்காட்சி தொடர்களையும் நேரடியாக வழங்கும் ஓடிடி வசதி திரையுலகிற்கான புதிய தொழில்நுட்ப பாதை என ஒரு தரப்பினர் உற்சாகம் கொள்கின்றனர். ஆனால், ஓடிடி திரையுலகை அழித்துவிடக்கூடும் என இன்னொரு தரப்பினர் அஞ்சுகின்றனர்.

இன்னொரு பக்கம் திரையரங்க உரிமையாளர்களோ, ஓடிடி வசதி திரையங்களை பாதித்து, சினிமாவை கேள்விக்குறியாகிவிடும் என்கின்றனர். உள்ளங்கையில் வைத்து படம் பார்ப்பது, திரையரங்கில் படம் பார்க்கும் அனுபவத்தை அளிக்குமா? என்றும் கேட்கின்றனர். இதனிடையே புதிய தமிழ் படங்களும், இந்தி படங்களும் ஓடிடியில் வெளியாகி கொண்டிருக்கின்றன. லாக்டவுன் காலத்தில் வேறு வழியில்லை என்பதால், ஓடிடியில் வெளியிடுவது ஏற்ற வழியாக இருந்தாலும், இந்த நிலை தொடர்ந்தால் பாரம்பரியமான சினிமா தயாரிப்பும், வெளியிடும் பாதிக்குமே என்ற கவலையும் பலருக்கு இருக்கிறது.

ஓடிடி மேடை, திரையுலகின் மீது மட்டும் தாக்கம் செலுத்திக்கொண்டிருக்கவில்லை, பொழுதுபொக்கை நாம் அணுகும் விதத்தை இது மாற்றக்கூடியதாக இருக்கிறது. தொலைக்காட்சிகளும், ஓடிடியால் பெரும் மாற்றத்தை சந்தித்துக்கொண்டிருக்கின்றன. ஓடிடி நுட்பம், பாரம்பரிய விநியோக முறைகளை தகர்த்துக்கொண்டிருக்கும் நிலையில், பொழுதுபோக்கு உள்ளடக்கம் ரசிகர்களை நேரடியாக சென்றடையவும் வழி செய்கிறது.

இது ரசிகர்களுக்கு எண்ணற்ற வாய்ப்புகளை வழங்குவதோடு படைப்பாளிகளுக்கும் புதிய வாயில்களை திறக்க கூடியதாக இருக்கிறது. ஸ்டூடியோக்கள் கோலோச்சிய இடத்தில் ஸ்டிரீமிங் நிறுவனங்கள் புதிய சக்தியாக உருவெடுத்துக்கொண்டிருக்கின்றன. இன்னொரு பக்கம் பார்த்தால், பார்வையாளர்களின் ரசனையை துல்லியமாக குறி வைக்க, அல்கோரிதம்கள் புதிய கணக்குகளை போட்டுத்தருகின்றன. பிக்டேட்டா ஆயுதம் இன்னும் என்ன எல்லாம் செய்யும் என்று தெரியவில்லை.

இத்தகைய புதிய சவால்களை தொழில்நுட்பம் உண்டாக்கி இருந்தாலும், வெள்ளித்திரையில் ரசிகர்களை மகிழ்வித்த சினிமா, ஏ.ஆர் , வி.ஆர் போன்ற வளரும் நுப்டங்கள் மூலம் தன்னை மாற்றி அமைத்துக்கொள்ளும் என எதிர்பார்க்கப்படுகிறது. இம்மர்சிவ் மீடியா என சொல்லப்படும் புதிய வகை கதை சொல்லல், முற்றிலும் புதிய வகை சினிமாவுக்கு வித்திடும் என்றும் சொல்லப்படுகிறது. திரையரங்குகள் காணாமல் போகும் என்று அஞ்சப்படுவதற்கு மாறாக, திரையரங்கில் பார்த்தால் மட்டுமே முழுமையாக அனுபவிக்க முடியும் எனும் வகையில் உள்ளடக்கத்தை கொண்ட திரைப்படங்கள் வெளியாகலாம் என்றும் எதிர்பார்க்கப்படுகிறது. இதற்கேற்ப நவீன திரையரங்களும் தொழில்நுட்ப மாய அரங்குகளாக மாறலாம் என்கின்றனர். எனில் எதிர்கால சினிமா எப்படி இருக்கும் எனும் சுவாரஸ்யமான கேள்வி எழுகிறது.

இந்த பின்னணியில் ஓடிடி எனும் ஸ்டிரீமிங்கின் தொழில்நுட்ப பின்னணி, அதன் வரலாறு ஆகிவற்றை திரும்பி பார்த்து, எதிர்கால சினிமாவின் திசையையும் 4தமிழ்மீடியாவில் வாரந்தோறும் வெளிவரும் இந்தப் புதிய தொடர் மூலம் அலசி ஆராயலாம் வாருங்கள் !

- சைபர்சிம்மன்

Comments powered by CComment

இந்தச் செய்தியை மற்றவர்களும் அறிவது நல்லது எனில் கீழேயுள்ள பட்டன்களில் அழுத்தி உங்கள் சமூக வலைத் தளங்களில் பகிர்ந்து கொள்ளுங்கள்

 

We use cookies

We use cookies on our website. Some of them are essential for the operation of the site, while others help us to improve this site and the user experience (tracking cookies). You can decide for yourself whether you want to allow cookies or not. Please note that if you reject them, you may not be able to use all the functionalities of the site.