அன்பே சிவமாகும். இந்த அகிலமெங்கும் பரந்து செறிந்து நிறைந்து வாழும் ஜீவன்கள் அனைத்திலும் அன்பு நிறைந்து இருக்கிறது. அந்த அன்புக்குள் சிவம் ஒளிந்திருந்து. எம்மை ஆட்கொள்கின்றான்.

இல்லங்களில் அக அழகினைக் கூட்டுவது இல்லக விளக்கு. இல்லக விளக்கிற்குச் சிறப்பான நாளான,கார்த்திகை விளக்கீடு என்பது தமிழர் மரபில் பல ஆயிரம் ஆண்டுகளாகப் பின்பற்றப்படும் மிகப் பழமையான ஒளித் திருநாள்களில் ஒன்றாகும். இந்த நாளில் இல்லங்களில் தீபம் ஏற்றுவது அறிவையும் ஆன்மீகத்தையும் வெளிச்சப்படுத்தும் ஒரு புனிதச் செயல் என்று கருதப்படுகிறது.  இந்த மரபின் தோற்றம், அதற்குப் பின்னுள்ள தத்துவம், வழிபாட்டு முறைகள் பற்றிச் சற்று விரிவாகக் காணலாம்.

இல்லக விளக்கது இருள் கெடுப்பது என்கிறது அப்பர் தேவாரம். விளக்கு எனும் தீபம் ஏற்றுவது மங்கலம் தரும் விஷயம்.அதனால்தான் தமிழர்தம் வாழ்வியலின் முக்கிய தருணங்கள், வழிபாடுகளின் போதெல்லாம் தீபம் ஏற்றுதல் முக்கியம் பெறுகிறது.