உலகை அழகாக்கும் பத்மாவின் கைகள் !

“உழைப்பே உயர்வு; நேர்மையே மனிதனின் நிஜ அலங்காரம்” என்ற பழமொழி வாழ்க்கையின் உண்மையை வெளிப்படுத்துகிறது. சமூகத்தின் வளர்ச்சிக்கும் நலனுக்கும் ஒவ்வொருவரின் பங்களிப்பும் அவசியமானது. அந்த வகையில், வெளிச்சத்திற்குப் புலப்படாமல் அமைதியாக உழைத்து சமூகத்தின் சுகாதாரத்தை காக்கும் தூய்மை பணியாளர்களின் பங்கு அளவிட முடியாதது. அப்படிப்பட்ட பணியாளர்களில் ஒருவர் தான் பத்மா.

ஒரு நகரம் சுத்தமாக இருப்பது நமது கண்களுக்கு அழகை தருகிறது. ஆனால் அந்த அழகுக்குப் பின்னால் இருக்கும் கைகள் எத்தனை துன்பங்களையும் கஷ்டங்களையும் தாங்கிக் கொண்டிருக்கின்றன என்பதை நாம் சிந்திப்பதில்லை. அதிகாலையில் மக்கள் இன்னும் உறங்கிக் கொண்டிருக்கும் நேரத்தில் பத்மா தனது பணியைத் தொடங்குகிறார். குப்பைகளை அகற்றி, தெருக்களை சுத்தம் செய்து, நாற்றமில்லாத சூழலை உருவாக்குகிறார். அவரது உழைப்பால் தான் நகரம் ஆரோக்கியமாகவும், நோயற்றதாகவும் திகழ்கிறது.

“சுத்தம் சுகம் தரும்” என்பது வெறும் சொற்றொடர் அல்ல; அது வாழ்க்கை நெறி. சுத்தமான சூழல் தான் நல்ல ஆரோக்கியத்திற்கும் நல்ல மனநிலைக்கும் அடிப்படை. இதை செயல்படுத்தும் அடித்தள வீரர்கள் தூய்மை பணியாளர்களே. எனவே, பத்மா போன்றவர்களை நாம் ஒரு சாதாரண தொழிலாளி என்று பார்க்காமல், சமூக காவலர் என்று மதிப்பளிப்பதே பொருத்தமானது.

கௌரவம் – மனிதனின் அடிப்படை உரிமை

ஒரு மனிதனுக்கு கிடைக்க வேண்டிய மிகப்பெரிய பரிசு மரியாதை. பணியின் தன்மையை வைத்து ஒருவரைத் தாழ்த்திப் பார்க்கக் கூடாது. “வேலை சிறியது இல்லை; மனப்பான்மை தான் சிறியது” என்று கூறுவர். பத்மா தனது பணியை பெருமையுடன் செய்கிறார். தூய்மைப் பணியாளருக்கான சீருடைதான் எனது அடையாளம் எனச் சொல்லியவாறே,  பாராட்டும் இடங்களிளெல்லாம் அவர் தோன்றுவது, தன் பணியின் மீதான, தன்சமூகத்தின் மீதான பற்றுதலுக்கான  பெருமைமிகு அடையாளம். அவர் செய்யும் வேலை இல்லையெனில் நமது நகரம் குப்பைக் கிடங்காக மாறிவிடும். ஆகவே, அவருக்கு நன்றி தெரிவிப்பதும், கௌரவிப்பதும் நமது கடமையாகும்.

ஒரு பள்ளியில், மாணவர்கள் தூய்மை பணியாளருக்கு நன்றி தெரிவிக்கும் நாள் ஒன்றை கொண்டாடினர். அந்த ஒரு நிகழ்வு, அந்த பணியாளரின் கண்களில் கண்ணீரை வரவழைத்தது. மரியாதை என்பது பணத்தை விட பெரியது என்பதை இது காட்டுகிறது. பத்மாவும் அப்படித்தான் ஒரு “நன்றி” என்ற சொல்லே அவருக்கு மிகப்பெரிய ஊக்கமாக இருக்கும்.

நேர்மை – வாழ்க்கையை உயர்த்தும் ஒளி

நேர்மை என்பது மனிதனின் உள்ளார்ந்த செல்வம். பத்மா தனது பணியை அலட்சியமின்றி, கடமை உணர்வுடன் செய்கிறார். யாரும் பாராட்டவில்லை என்றாலும், அவர் சுத்தமாகச் செய்வதை நிறுத்துவதில்லை. இதுவே உண்மையான நேர்மை.

“நேர்மையானவன் நிமிர்ந்து நடப்பான்” என்ற பழமொழி போல, நேர்மையுடன் வாழ்பவர்களுக்கு தன்னம்பிக்கை தானாகவே வரும். பத்மாவின் வாழ்க்கை இதற்குச் சிறந்த எடுத்துக்காட்டு. சம்பளம் குறைவாக இருந்தாலும், மனநிறைவு அதிகம். ஏனெனில் அவர் தனது கடமையை உண்மையுடன் செய்கிறார்.

தமிழ் இலக்கியங்களிலும் நேர்மையின் மகத்துவம் கூறப்பட்டுள்ளது. “ஒழுக்கம் விழுப்பம் தரலான்; ஒழுக்கம் உயிரினும் ஓம்பப் படும்.” எனத் திருவள்ளுவர் கூறுகிறார்

அதாவது, ஒழுக்கமும் நேர்மையும் மனிதனுக்கு உயர்வையும் புகழையும் தருகின்றன. அதனால் அதை உயிரைவிடவும் காக்க வேண்டும் என்பதே பொருள். பத்மாவின் வாழ்க்கை இந்தக் குறளின் நடைமுறை வடிவமாக உள்ளது.

நம்பிக்கை – நல்ல சமூகத்தின் அடித்தளம்

ஒருவர் தனது பணியை பொறுப்புடன் செய்தால், மற்றவர்களிடம் நம்பிக்கை உருவாகிறது. பத்மா தினமும் தனது பணியை நேரத்திற்கு செய்து முடிப்பதால், மக்கள் “இங்கு சுத்தம் இருக்கும்” என்ற நம்பிக்கையுடன் வாழ்கிறார்கள். இந்த நம்பிக்கையே சமூக ஒற்றுமையை வளர்க்கிறது. ஒரு பகுதி மக்கள் தூய்மையாக வாழத் தொடங்கினால், மற்ற பகுதிகளும் அதை பின்பற்றும். இதனால் நல்ல மாற்றம் ஏற்படும். இதுபோல பத்மா போன்றோரின் உழைப்பு சமூகத்தில் நல்ல முன்னுதாரணத்தை உருவாக்குகிறது.

“ஒரு நல்ல செயல் ஆயிரம் நல்ல செயல்களை உருவாக்கும்” என்பார்கள். பத்மாவின் நேர்மையும் உழைப்பும் பலரையும் தூண்டுகிறது. இதுவே நம்பிக்கை வளர்ப்பு.

 பத்மா போன்றோர் சமுதாயத்தின் உண்மையான செயல் வீரர்கள். அவர்களின் உழைப்பு இல்லையெனில் நமது வாழ்க்கை சீர்குலைந்து விடும். அவர்கள் செய்யும் பணியை மதித்து, அவர்களுக்கு உரிய கௌரவம் அளிப்பது நமது மனிதத் தன்மையின் அடையாளம். பத்மா தூய்மை பணியாளர் மட்டுமல்ல நேர்மைப் பணியாளரும் கூட. அதனாலேயே அவர் இன்று நாடு கடந்தும் கொண்டாடப்படுகிறார்.

உழைப்பை மதிப்பது, நேர்மையை கடைப்பிடிப்பது, மற்றவர்களிடம் நம்பிக்கையை வளர்ப்பது என்பன நம் அனைவருக்குமானது . அப்போதுதான் ஒரு நல்ல சமூகத்தை உருவாக்க முடியும். “உழைத்திடும் கைகள் தான் உலகை அழகாக்குகின்றன”  அந்த கைகளுக்குள் பத்மாவின் கைகளும்.