மொரீஷியஸ் தீவுகளில்  புரட்டாதிச் சனி விரத மரபும் கோவிந்தன் வழிபாடும் !

அத்தீவில் வாழும் தமிழர்களின் சமயப் பாரம்பரியத்தில் புரட்டாதி மாதமும், புரட்டாதிச் சனி விரதமும், கோவிந்தன் திருவிழாவும் தனி இடம் பெற்றுள்ளன. இது வெறுமனே ஒரு மாத விரதமோ, கோயில் வழிபாடோ அல்ல. பல தலைமுறைகளைக் கடந்து வந்த நம்பிக்கை, குடும்ப ஒழுக்கம், தமிழர் அடையாளம், பக்திப் பாடல், கலை, சமூக ஒற்றுமை ஆகியவற்றை ஒன்றிணைக்கும் ஓர் ஆன்மீகப் பாலமாக அது விளங்குகிறது.

புரட்டாதி – திருமாலுக்குரிய புனித மாதம்

தமிழ் சமய மரபில் புரட்டாதி மாதம் திருமால் வழிபாட்டுக்கு மிகவும் உகந்த காலமாகக் கருதப்படுகிறது. குறிப்பாக சனிக் கிழமைகள் திருமால், கோவிந்தன், வேங்கடேசப் பெருமாள் ஆகியோருக்குச் சிறப்பு வழிபாடு நடைபெறும் நாள்களாக பல குடும்பங்களிலும் ஆலயங்களிலும் கடைப்பிடிக்கப்படுகின்றன.

மொரீஷியஸிலும் இதே பக்தி மரபு ஒரு தனித்துவமான சமூக வடிவத்தைப் பெற்றுள்ளது. புரட்டாதி மாதத்தில் பக்தர்கள் விரதமிருந்து, ஒவ்வொரு சனிக்கிழமையும் கோயில்களில் சிறப்பு வழிபாடுகளில் கலந்துகொள்கின்றனர்.சிலர் ஒருவேளை உணவு மட்டுமே உட்கொள்கின்றனர்; சிலர் முழுமையான சைவ உணவை மட்டும் மேற்கொள்கின்றனர். இறைநினைவு, தூய்மை, மதுவிலக்கு, அசைவ உணவு தவிர்த்தல் போன்ற கட்டுப்பாடுகளும் பல குடும்பங்களில் கடைப்பிடிக்கப்படுகின்றன.

இதனால் புரட்டாதி விரதம் என்பது உணவைத் தவிர்ப்பதற்கான விரதம் மட்டுமல்ல; புலனடக்கம், மனத்தூய்மை, இறைச்சிந்தனை ஆகியவற்றை வளர்க்கும் ஆன்மீகப் பயிற்சி என்ற பொருளைப் பெறுகிறது. ‘கோவிந்தா!’ என்ற நாமத்தின் பின்னால், மொரீஷியஸ் தமிழர்களிடையே புரட்டாதி விரதம் பெரும்பாலும் ‘கோவிந்தன் விரதம்’ அல்லது ‘கோவிந்தன் திருவிழா’ என்ற பெயருடனும் தொடர்புபடுத்தப்படுகிறது.

கோவிந்தன் என்பது திருமாலின் திருநாமங்களில் ஒன்று. கிருஷ்ணரையும் கோவிந்தன் என்று பக்தி மரபு அழைக்கிறது. அதனால் மொரீஷியஸ் வழிபாட்டு மரபில் விஷ்ணு–கிருஷ்ணர்–கோவிந்தன்–வேங்கடேசப் பெருமாள் ஆகிய திருமாலின் பல்வேறு திருநாமங்களும் உருவங்களும் ஒரே வைணவ பக்திப் பரப்பில் இணைந்து நிற்கின்றன. உள்ளூர் கோவிந்தன் விழா பற்றிய செய்திகளிலும், இந்த வழிபாடு கிருஷ்ணருக்குரியதாகவும், விஷ்ணுவின் பாதுகாப்புத் தன்மையோடு தொடர்புடையதாகவும் குறிப்பிடப்படுகிறது.

அதனால் தான் புரட்டாதி சனியன்று ஆலயங்களில்  “கோவிந்தா! கோவிந்தா!” எங்களைக் காத்தருள்வாய்; எங்கள் இல்லங்களில் அமைதியை நிலைநிறுத்துவாய்; எங்கள் வாழ்வில் அறத்தை வளர்ப்பாய்; எங்கள் மனத்தில் இறைநம்பிக்கையை நிலைநிறுத்துவாய் என்ற பக்தனின் உள்ளார்ந்த வேண்டுதலாக மாறுகிறது.

நான்கு சனிகள் – நான்கு ஆன்மீகப் படிகள்

மொரீஷியஸில் கோவிந்தன் திருவிழா பொதுவாக புரட்டாதி மாதத்தின் நான்கு சனிக்கிழமைகளையும் மையமாகக் கொண்டதாகக் காணப்படுகிறது. ஒவ்வொரு சனிக்கிழமையும் ஆலயங்களில் சிறப்பு வழிபாடுகள், பஜனைகள், பிரார்த்தனைகள் நடைபெறுகின்றன. சில இடங்களில் சனிக்கிழமை மாலை தொடங்கும் வழிபாடு மறுநாள் அதிகாலை வரை நீளும் மரபும் காணப்படுகிறது. 

மொரீஷியஸ் கோவிந்தன் திருவிழாவின் காட்சிகளில் குறிப்பிடத்தக்க ஒன்று பெரிய குத்துவிளக்கைச் சுற்றி நடைபெறும் வழிபாடு. புரட்டாதி சனிக்கிழமை இரவுகளில் பெரிய விளக்கு ஏற்றப்பட்டு, அதைச் சுற்றி பக்திப் பாடல்கள், பிரார்த்தனைகள், கும்மி, கோலாட்டம் போன்ற தமிழர் பாரம்பரியக் கலை வடிவங்களும் இடம்பெறுகின்றன. சில ஆலயங்களில் விளக்கு இரவு முழுவதும் எரியவிடப்படுகிறது.

இங்கே விளக்கு ஒரு சடங்குப் பொருள் மட்டுமல்ல.

விளக்கு – ஞானத்தின் அடையாளம். ஒளி – இறை அருளின் அடையாளம். இருள் – அறியாமையின் அடையாளம். எனவே, “வாழ்வின் இருளை அகற்றும் இறைஒளி எங்கள் இல்லங்களிலும் உள்ளங்களிலும் நிலவட்டும்” என்ற பிரார்த்தனையின் காட்சியாக இந்த விளக்கை நாம் புரிந்துகொள்ளலாம். கடல் கடந்த தமிழரின் ஆன்மீக நினைவகம்

மொரீஷியஸில் தமிழர் சமய மரபு எவ்வாறு இவ்வளவு வலுவாக நிலைத்தது? இதற்குப் பின்னால் நீண்ட வரலாறு இருக்கிறது.

தமிழர்கள் மொரீஷியஸுக்கு பல்வேறு காலகட்டங்களில் சென்றனர். பிரெஞ்சு ஆட்சிக் காலத்திலேயே தென்னிந்தியாவிலிருந்து வணிகர்களும் கைவினைஞர்களும் சென்றிருந்தனர்; பின்னர் 19ஆம் நூற்றாண்டில் ஒப்பந்தத் தொழிலாளர்களாகவும் ஏராளமான தமிழர்கள் சென்றனர். அவர்கள் தங்கள் உழைப்புடன் தங்கள் மொழியையும், தெய்வங்களையும், ஆலயங்களையும், திருவிழாக்களையும் எடுத்துச் சென்றனர். அதனால் மொரீஷியஸ் கோயில்கள் வெறும் வழிபாட்டுத் தலங்களாக மட்டும் அமையவில்லை.

மொரீஷியஸ் தமிழர் கோயில்கள் சமூக ஒற்றுமைக்கும் தமிழர் பண்பாட்டு அடையாளத்திற்கும் முக்கியப் பங்காற்றியதாக ஆய்வுகளும் சுட்டிக்காட்டுகின்றன. மொரீஷியஸில் கோவிந்தன் திருவிழாவின் தனித்துவம்

கிடைக்கும் வரலாற்றுப் பதிவுகளின்படி, மொரீஷியஸில் கோவிந்தன் திருவிழாவை ஒழுங்கமைத்துச் சிறப்பாகக் கொண்டாடிய தமிழர் அமைப்புகளில் Hindu Hymn Society, பின்னர் Parama Bhakta Suguna Bhajana Sangham என அறியப்பட்ட அமைப்பும் குறிப்பிடத்தக்கது. புரட்டாதி மாதத்தில் ஒரு மாத விரதத்துடன் ஒவ்வொரு சனிக்கிழமையும் சிறப்பு வழிபாடு நடைபெற்றதாக வரலாற்றுக் குறிப்புகள் தெரிவிக்கின்றன.

இதன் மூலம் ஒரு முக்கியமான உண்மையைப் புரிந்துகொள்ளலாம்.மொரீஷியஸில் கோவிந்தன் வழிபாடு வெறுமனே இந்தியாவில் இருந்து அப்படியே எடுத்துச் செல்லப்பட்ட ஒரு சடங்காக மட்டும் இல்லாமல், மொரீஷியஸ் மண்ணில் வாழ்ந்த தமிழர்களால் தொடர்ந்து கடைப்பிடிக்கப்பட்டு, அவர்களது சமூக வாழ்வோடு இணைந்து வளர்ந்த ஒரு புலம்பெயர் பக்தி மரபாகவும் உருவெடுத்திருக்கிறது. 

விரதம் – உணவை வெல்வதா? ஆசையை வெல்வதா?

இன்றைய வாழ்க்கையில் விரதம் குறித்து நாம் சிந்திக்க வேண்டிய முக்கியமான கேள்வி இது. விரதம் என்றால் உணவு உண்ணாமல் இருப்பதா? இல்லை. ‘விரதம்’ என்பது விரத நெறி. உடலைக் கட்டுப்படுத்துவதோடு மனத்தையும் கட்டுப்படுத்துவதே அதன் ஆழமான நோக்கம்.

புரட்டாதி சனியில் அசைவத்தைத் தவிர்ப்பது நல்லது. ஆனால் அதைவிட முக்கியமானது. வார்த்தையில் தீமை வராமல் பார்த்துக்கொள்வது; பிறரைப் பற்றிப் புறங்கூறாமல் இருப்பது; கோபத்தைக் கட்டுப்படுத்துவது; பொறாமையை அகற்றுவது; மது போன்ற தீய பழக்கங்களைத் தவிர்ப்பது; இறைநாமத்தை நினைப்பது; பசித்தவருக்கு உணவளிப்பது. அப்போது தான் விரதம் வயிற்றின் விரதத்திலிருந்து உள்ளத்தின் விரதமாக உயர்கிறது. 

கோவிந்தன் திருவிழாவில் பெண்கள் பாரம்பரிய உடையணிந்து கும்மி, கோலாட்டம் ஆடுவது, பக்திப் பாடல்கள் பாடுவது, குடும்பங்கள் ஒன்றுகூடுவது போன்றவை, சமயத்தையும் பண்பாட்டையும் பிரிக்க முடியாதவையாக ஆக்குகின்றன.

இதுவே புலம்பெயர் சமூகங்களின் தனிச்சிறப்பு. தாயகத்தில் இயல்பாகக் கிடைத்திருந்த ஒரு மரபை, வெளிநாட்டில் வாழும் தலைமுறை அறிந்தே காப்பாற்ற வேண்டியிருக்கிறது. 

பகவான் கிருஷ்ணரின் கீதோபதேசத்திலும் மனிதனுடைய உயர்வு வெளிப்புற வெற்றியால் அல்ல, உள்ளத்தை வெல்வதிலேயே இருப்பதாகக் காண்கிறோம். அந்த வகையில் புரட்டாதி விரதம், ஒரு மாத காலத்திற்கு வாழ்க்கையைச் சற்று மெதுவாக்கி, “நான் எதற்காக வாழ்கிறேன்?” என்று நம்மையே கேட்கச் செய்யும் ஓர் ஆன்மீக இடைவெளியாக அமைகிறது.

மொரீஷியஸ் மண்ணில் முளைத்த தமிழ்ப் பக்தியின் மரம்

இந்திய மண்ணிலிருந்து புறப்பட்ட தமிழர்கள் கடல் கடந்தார்கள். அவர்களுடன் சென்றது அவர்களது உடைமைகள் மட்டுமல்ல. திருநீறு சென்றது, குங்குமம் என்பவற்றுடன், திருப்பாடல்கள் சென்றன,கோயில் சென்றது, கோவிந்தன் சென்றான், கூடவே தமிழும்  சென்றது.

தலைமுறைகள் மாறின.நாடு மாறியது,மொழிப் பயன்பாட்டிலும் சமூக வாழ்விலும் மாற்றங்கள் வந்தன. ஆனால் புரட்டாதி சனி வந்தபோது, வீட்டில் விளக்கு ஏற்றப்பட்டது. விரதம் தொடங்கியது.ஆலய மணி ஒலித்தது. கும்மி தொடங்கியது. “கோவிந்தா! கோவிந்தா!” என்ற குரல் எழுந்தது.

அந்தக் குரலில் ஒரு தீவின் தமிழர் வரலாறும், ஒரு சமூகத்தின் நினைவும், ஒரு குடும்பத்தின் பக்தியும் ஒன்றாகக் கலந்திருக்கின்றன. கடல் பிரித்தாலும், பக்தி பிரிக்கவில்லை. மொரீஷியஸ் தீவுகளில் ஒவ்வொரு புரட்டாதிச் சனியும் இதைத்தான் நமக்குச் சொல்லிக் கொண்டிருக்கிறது.

• - 4தமிழ்மீடியாவிற்காக : மாதுமை