வரலாற்றின் ஆன்மீகப் பெருமையும் நவீன தொழில்நுட்பத்தின் வியப்பூட்டும் ஆற்றலும் ஒரே நகரத்தில் சங்கமித்தால் அது பார்சிலோனா எனலாம். ஸ்பெயினின் கட்டடக் கலைச் சிறப்புகளைப் பற்றிப் பேசும்போது, உலகின் கவனத்தை ஈர்க்கும் இரண்டு முக்கியமான கட்டடங்கள் பார்சிலோனா நகரில் அமைந்துள்ளன.
ஒன்று, நூற்றாண்டுகளைக் கடந்து கட்டப்பட்டு வரும் புகழ்பெற்ற சாக்ரதா பமிலியா (Sagrada Família) பேராலயம். மற்றொன்று, நவீனக் கட்டடக்கலையின் தனித்துவமான அடையாளமாகத் திகழும் டோரே குளோரிஸ் (Torre Glòries) உயர்மாடிக் கட்டடம்.
இவ்விரு கட்டடங்களும் வெவ்வேறு காலகட்டங்களைச் சேர்ந்தவை. ஆனால், மனிதனின் கற்பனைத் திறன், பொறியியல் நுட்பம், அழகியல் உணர்வு ஆகியவை எத்தகைய அற்புதங்களைப் படைக்க முடியும் என்பதற்கு இவை இரண்டும் சிறந்த சான்றுகளாக விளங்குகின்றன.
சாக்ரதா பமிலியா: கல்லில் செதுக்கப்பட்ட ஆன்மீகக் கவிதை
பார்சிலோனா நகரின் மையப்பகுதியில் கம்பீரமாக எழுந்து நிற்கும் சாக்ரதா பமிலியா, உலகப் புகழ்பெற்ற கட்டடக் கலைஞர் அன்டோனி கௌடி (Antoni Gaudí) அவர்களின் வாழ்நாள் கனவாகும்.
1882ஆம் ஆண்டு மார்ச் 19ஆம் தேதி இப்பேராலயத்தின் அடிக்கல் நாட்டப்பட்டது. ஆரம்பத்தில் கட்டடக் கலைஞர் பிரான்சிஸ்கோ டி பவுலா டெல் வில்லார் (Francisco de Paula del Villar) இதன் வடிவமைப்புப் பொறுப்பை ஏற்றிருந்தார். 1883ஆம் ஆண்டு கௌடி இத்திட்டத்தின் பொறுப்பை ஏற்றுக்கொண்ட பின்னர், அதன் கட்டடக் கலை வடிவமே முற்றிலும் மாறியது.
கோதிக் கட்டடக் கலையின் மரபுகளையும் இயற்கையின் வடிவங்களையும் இணைத்து, மத நம்பிக்கையை கட்டடக்கலையின் வழியாக வெளிப்படுத்தும் புதிய அணுகுமுறையை அவர் உருவாக்கினார்.
இயற்கையே கட்டடக்கலையின் ஆசிரியர் !
சாக்ரதா பமிலியாவின் மிக முக்கியமான சிறப்பு அதன் தூண்களின் அமைப்பாகும். மரங்களின் கிளைகள் மேல்நோக்கிப் பரவுவதைப் போன்று, கட்டடத்தின் உட்புறத் தூண்கள் மேலே சென்று பல கிளைகளாகப் பிரிகின்றன. இதனால், ஒரு பிரம்மாண்டமான கற்காட்டிற்குள் நுழைந்த உணர்வு பார்வையாளர்களுக்கு ஏற்படுகிறது.
இயற்கையின் வடிவங்களைப் பயன்படுத்துவது வெறும் அழகியல் நோக்கத்திற்காக மட்டுமல்ல. கட்டடத்தின் எடையைச் சீராகத் தாங்குவதற்கும், கட்டமைப்பின் வலிமையை அதிகரிப்பதற்கும் இந்த வடிவமைப்பு உதவுகிறது.
மேலும், அதன் வண்ணக் கண்ணாடி ஜன்னல்கள் வழியாக உள்ளே புகும் சூரிய ஒளி, காலைப் பொழுதிலும் மாலை நேரத்திலும் வெவ்வேறு வண்ணங்களில் கட்டடத்தின் உட்புறத்தை ஒளிரச் செய்கிறது. இதனால், கட்டடம் ஒரு வழிபாட்டுத் தலமாக மட்டுமல்லாமல், ஒளியும் வண்ணமும் இணைந்த கலைக்கூடமாகவும் காட்சியளிக்கிறது.
மூன்று முகப்புகள் – மூன்று ஆன்மீகச் செய்திகள் !
சாக்ரதா பமிலியாவில் மூன்று முக்கிய முகப்புகள் அமைக்கப்பட்டுள்ளன.
- Nativity Facade: இயேசுவின் பிறப்பையும் இயற்கையின் வளத்தையும் மகிழ்ச்சியையும் வெளிப்படுத்துகிறது.
- Passion Facade: இயேசுவின் துன்பங்களையும் சிலுவை மரணத்தையும் சிற்பங்களின் வழியாக எடுத்துரைக்கிறது.
- Glory Facade: இறைமகிமை, விண்ணுலகம் மற்றும் ஆன்மீக விடுதலை ஆகிய கருத்துகளை மையமாகக் கொண்டது. இதன் கட்டுமானப் பணிகள் இன்னும் தொடர்ந்து நடைபெறுகின்றன.
மேலும், முழுமையான திட்டத்தில் 18 கோபுரங்கள் இடம்பெறுகின்றன. அவை 12 அப்போஸ்தலர்கள், நான்கு சுவிசேஷகர்கள், கன்னி மரியாள் மற்றும் இயேசு கிறிஸ்து ஆகியோரைக் குறிக்கின்றன.
கௌடி 1926ஆம் ஆண்டு மறைந்தபோதும், அவரது கனவு முடிவுக்கு வரவில்லை. பல தலைமுறைகளாகப் பல்வேறு கட்டடக் கலைஞர்களும் பொறியாளர்களும் இப்பணியைத் தொடர்ந்து வருகின்றனர். 2026ஆம் ஆண்டு இயேசு கிறிஸ்துவின் மையக் கோபுரம் நிறைவு செய்யப்பட்டிருப்பது இப்பேராலயத்தின் கட்டுமான வரலாற்றில் முக்கியமான மைல்கல்லாகும். இருப்பினும், முழுமையான பேராலயப் பணிகள் தொடர்ந்து நடைபெறுகின்றன.
உலகளாவிய முக்கியத்துவம்
2005ஆம் ஆண்டு சாக்ரதா பமிலியாவின் பிறப்புக் காட்சியைச் சித்தரிக்கும் முகப்பும் அதன் மறைவறையும் (Crypt) யுனெஸ்கோவின் உலகப் பாரம்பரியப் பட்டியலில் சேர்க்கப்பட்டன. 2010ஆம் ஆண்டு போப் பெனடிக்ட் XVI இப்பேராலயத்தை வழிபாட்டிற்காக அர்ப்பணித்து, சிறிய பேராலயம் (Minor Basilica) என்ற அந்தஸ்தையும் வழங்கினார்.
இன்று இது ஒரு மத வழிபாட்டுத் தலமாக மட்டுமல்லாமல், ஸ்பெயினின் கலாசார அடையாளமாகவும், உலகளாவிய கட்டடக் கலை ஆய்வுகளுக்கான முக்கிய மையமாகவும் விளங்குகிறது.
மிராடோர் டோரே குளோரிஸ்: நவீனத்துவத்தின் வானளாவிய அடையாளம்
சாக்ரதா பமிலியா கடந்த நூற்றாண்டுகளின் ஆன்மீக மற்றும் கலை மரபுகளைப் பிரதிபலிக்கிறது என்றால், டோரே குளோரிஸ் 21ஆம் நூற்றாண்டின் தொழில்நுட்ப வளர்ச்சியையும் நவீன நகர்ப்புறக் கட்டடக் கலையையும் பிரதிபலிக்கிறது.
பார்சிலோனாவின் பிளாசா டி லெஸ் குளோரிஸ் (Plaça de les Glòries) பகுதியில் அமைந்துள்ள இந்தக் கட்டடம், பிரெஞ்சுக் கட்டடக் கலைஞர் ஜீன் நுவெல் (Jean Nouvel) மற்றும் பார்சிலோனாவைச் சேர்ந்த b720 Arquitectos நிறுவனத்தின் ஒத்துழைப்பில் உருவாக்கப்பட்டது.
1999ஆம் ஆண்டு தொடங்கிய இதன் கட்டுமானம் 2005ஆம் ஆண்டு நிறைவடைந்தது. சுமார் 144 மீட்டர் உயரமுள்ள இக்கட்டடம், முன்பு டோரே அக்பார் (Torre Agbar) என அழைக்கப்பட்டது. பின்னர் டோரே குளோரிஸ் எனப் பெயர் மாற்றம் பெற்றது.
நீரூற்றை நினைவூட்டும் வடிவமைப்பு !
இந்தக் கட்டடத்தின் வெளித்தோற்றம் தரையிலிருந்து வானத்தை நோக்கி எழும்பும் பிரம்மாண்டமான நீரூற்றைப் போன்று வடிவமைக்கப்பட்டுள்ளது. சிலர் இதனை மலை வடிவத்துடனும் ஒப்பிடுகின்றனர். குறிப்பாக, கௌடியின் கட்டடக் கலைப் பாரம்பரியத்தையும் மொன்செராட் (Montserrat) மலையின் தோற்றத்தையும் கருத்தில் கொண்டு இதன் வடிவமைப்பு உருவாக்கப்பட்டதாகக் கூறப்படுகிறது.
இதன் வெளிப்புறம் இரண்டு அடுக்குகளைக் கொண்டுள்ளது. உட்புறத்தில் பல்வேறு வண்ணங்களில் அமைந்த அலுமினியப் பகுதிகளும், வெளிப்புறத்தில் ஏராளமான கண்ணாடித் தகடுகளும் பொருத்தப்பட்டுள்ளன.
இந்த இரட்டை வெளிப்புற அமைப்பு வெறும் அலங்காரத்திற்காக அமைக்கப்படவில்லை. சூரிய வெப்பத்தைக் கட்டுப்படுத்தவும், இயற்கையான காற்றோட்டத்திற்கு உதவவும் இது வடிவமைக்கப்பட்டுள்ளது. இரவில் LED விளக்குகளின் ஒளியால் பல்வேறு வண்ணங்களில் மின்னும் இதன் தோற்றம் பார்சிலோனா நகரின் இரவுக் காட்சிக்கு தனித்துவமான அழகைச் சேர்க்கிறது.
மிராடோர் - வானத்திலிருந்து பார்சிலோனாவைக் காணும் அனுபவம் !
டோரே குளோரிஸின் மற்றொரு முக்கியச் சிறப்பு அதன் உச்சியில் அமைந்துள்ள மிராடோர் (Mirador) பார்வையாளர் தளமாகும். 2022ஆம் ஆண்டு பொதுமக்களின் பார்வைக்காகத் திறக்கப்பட்ட இந்தப் பார்வையாளர் மையம், சுமார் 125 மீட்டர் உயரத்தில் இருந்து பார்சிலோனாவின் 360 பாகைக் காட்சியை வழங்குகிறது.
இங்கிருந்து பார்சிலோனாவின் புகழ்பெற்ற கட்டடங்கள், மத்திய தரைக்கடல், மொன்ட்ஜுயிக் மலைப்பகுதி, கொல்செரோலா மலைத்தொடர் மற்றும் நகரின் விரிவான நகர்ப்புற அமைப்புகளை ஒரே இடத்திலிருந்து பார்வையிட முடிகிறது.
கட்டடத்தின் மேல் தளத்தில் அமைந்துள்ள 'Cloud Cities Barcelona' என்ற கலைநிறுவல் (Art Installation), அர்ஜென்டினாவைச் சேர்ந்த கலைஞர் டோமாஸ் சரசெனோவின் (Tomás Saraceno) படைப்பாகும். இது பார்வையாளர்களுக்கு வழக்கமான பார்வையாளர் மைய அனுபவத்தைத் தாண்டிய கலை மற்றும் விண்வெளி சார்ந்த உணர்வை வழங்குகிறது.
மேலும், நகரின் இயற்கை, அறிவியல், தொழில்நுட்பம், கலை மற்றும் தரவியல் சார்ந்த தகவல்களை ஒருங்கிணைக்கும் அனுபவ மையமாகவும் இது விளங்குகிறது.
இரண்டு கட்டடங்கள் – இரண்டு காலகட்டங்கள் – ஒரே கட்டடக் கலைப் பெருமை !
சாக்ரதா பமிலியாவையும் டோரே குளோரிஸையும் ஒப்பிட்டுப் பார்க்கும்போது, கட்டடக் கலையின் பரிணாம வளர்ச்சியைத் தெளிவாகப் புரிந்துகொள்ள முடிகிறது.இரண்டு கட்டடங்களிலும் இயற்கையின் தாக்கம் வெளிப்படுகிறது. சாக்ரதா பமிலியாவில் மரங்களின் கிளைகள், மலைகள், ஒளி ஆகியவை கட்டடத்தின் வடிவமைப்பில் பிரதிபலிக்கின்றன. டோரே குளோரிஸில் நீரூற்று, வண்ணங்கள், ஒளி மற்றும் இயற்கைச் சூழலுக்கு ஏற்ற கட்டுமான நுட்பங்கள் முக்கியத்துவம் பெறுகின்றன.
ஒன்று மத நம்பிக்கையின் ஆழத்தையும் மனிதனின் ஆன்மீகத் தேடலையும் வெளிப்படுத்துகிறது. மற்றொன்று நவீன மனிதனின் தொழில்நுட்ப அறிவையும் நகர்ப்புற வாழ்க்கையின் மாற்றங்களையும் எடுத்துக்காட்டுகிறது.
பார்சிலோனாவின் உலகளாவிய அடையாளம்
இந்த இரண்டு கட்டடங்களும் பார்சிலோனா நகரத்தின் சுற்றுலா வளர்ச்சிக்கும் சர்வதேசப் புகழுக்கும் முக்கியப் பங்களிப்புச் செய்கின்றன. உலகின் பல்வேறு நாடுகளிலிருந்தும் கட்டடக் கலைஞர்கள், பொறியாளர்கள், மாணவர்கள், வரலாற்று ஆர்வலர்கள், புகைப்படக் கலைஞர்கள் மற்றும் சுற்றுலாப் பயணிகள் இவற்றைப் பார்வையிட வருகின்றனர்.
குறிப்பாக, சாக்ரதா பமிலியா பாரம்பரியக் கட்டடக் கலையை நவீனத் தொழில்நுட்பத்துடன் எவ்வாறு இணைக்க முடியும் என்பதற்கான எடுத்துக்காட்டாகத் திகழ்கிறது. டோரே குளோரிஸ் சுற்றுச்சூழலுக்கு ஏற்ற நகர்ப்புறக் கட்டட வடிவமைப்பு மற்றும் புதிய தொழில்நுட்பங்களைப் பயன்படுத்துவதன் அவசியத்தை உணர்த்துகிறது.
இந்தக் கட்டடங்கள் பார்சிலோனாவின் சுற்றுலாத் துறையை மட்டுமல்லாமல், அதன் கலாசாரப் பொருளாதாரம், சர்வதேச அடையாளம் மற்றும் கட்டடக் கலைக் கல்வி ஆகியவற்றையும் வளப்படுத்துகின்றன.
காலத்தை வெல்லும் கலைப் படைப்புகள் !
ஒரு நகரத்தின் பெருமை அதன் உயரமான கட்டடங்களால் மட்டுமே அளவிடப்படுவதில்லை. அந்தக் கட்டடங்கள் மனித வரலாறு, பண்பாடு, கலை, அறிவியல் மற்றும் சிந்தனைகளுக்கு எவ்வாறு வடிவம் கொடுக்கின்றன என்பதில்தான் அதன் உண்மையான பெருமை அடங்கியுள்ளது.
சாக்ரதா பமிலியா மனிதனின் ஆன்மீகக் கனவுகளைக் கல்லில் வடித்துக் காட்டுகிறது. டோரே குளோரிஸ் நவீன அறிவியல் மற்றும் தொழில்நுட்பத்தின் வலிமையை வானத்தை நோக்கி உயர்த்திக் காட்டுகிறது. காலத்தால் அழியாத கலைப் பாரம்பரியத்தையும், எதிர்காலத்தை நோக்கிய நவீனச் சிந்தனைகளையும் ஒருங்கே தன்னகத்தே கொண்டுள்ள பார்சிலோனா, உலகின் கட்டடக் கலை வரலாற்றில் தனித்துவமான இடத்தைப் பெற்றிருப்பதில் வியப்பில்லை.
ஒரு கட்டிடம் இறைநம்பிக்கையின் உயரத்தை உணர்த்துகிறது; மற்றொன்று மனித அறிவின் உயரத்தை உணர்த்துகிறது. இரண்டும் இணைந்து பார்சிலோனாவின் வான்வெளியில் மனிதப் படைப்பாற்றலின் அழியாத கையொப்பங்களாகத் திகழ்கின்றன!
- 4தமிழ்மீடியாவிற்காக: மலைநாடான்